«Дарё» анъанавий ҳафталик дайжестида жаҳонда юз берган муҳим воқеалар ҳақида ҳикоя қилади.
Иккинчи импичмент
АҚШнинг амалдаги президенти Дональд Трампга нисбатан иккинчи марта импичмент эълон қилинди. Масала Демократик партиянинг кўпчилик овози (222 та) билан қабул қилинган, бундан ташқари, Республикачилар партиясининг 10 та вакили ҳам Трампга нисбатан импичмент эълон қилинишини маъқуллаб овоз берган.
Умумий ҳисобда Трампга нисбатан импичментни палатанинг 232 аъзоси маъқуллади. 197 нафар конгрессмен эса қарши овоз берди — уларнинг бари Республикачилар партиясидан сайланган вакиллардир.
Трампнинг ҳокимиятдан четлатилиши масаласини энди 19 январга қадар таътилда бўлган АҚШ Сенати кўриб чиқиши керак, Трампнинг АҚШ президенти сифатидаги ваколати эса 20 январь куни якунига етади.
Шундай қилиб, Трамп президентлик муддати давомида икки марта импичмент эълон қилинган АҚШ тарихидаги биринчи давлат раҳбарига айланди. Вакиллар палатаси унга нисбатан биринчи импичментни 2019 йилниг декабрида эълон қилган эди (ўшанда республикачиларнинг бари қарши овоз берган, бироқ палатада демократлар кўпчилик ўрин эгаси эди), лекин Сенат президентни ҳокимиятдан четлатишга қарши чиққан эди.
Bloomberg’нинг 12 январдаги ахборотига кўра, Трамп 6 январь кунги воқеалар (Капитолийнинг штурм қилиниши) учун «ҳар қандай жавобгарлик»ни рад этган, импичментни эса «жодугарларни овлаш»га ўхшатган.
13 январь куни Вакиллар палатасининг мажлиси давом этаётган вақтда Fox News телеканали Трампнинг баёнотини тарқатди, унда президент «барча америкаликларни хотиржамликка» чақирган.
«Янги намойишлар ташкил этилиши ҳақидаги хабарлар пайдо бўлгани муносабати билан, мен ҳеч қандай зўравонлик, ҳеч қандай қонунбузарлик ва ҳеч қандай вандализм ҳаракатларини содир этмасликка чақираман. Бу мен қўллаб-қувватлайдиган ҳолатлар эмас, бу Америка қўллаб-қувватлайдиган ҳолатлар эмас», — дея Трампнинг сўзларини келтирмоқда телеканал сайти.
Индонезияда зилзила
15 январь куни Индонезияда 6,2 магнитудали зилзила юз берди. Ер ости силкинишлари Ғарбий Сулавеси провинциясида қайд этилган.
Зилзила натижасида ҳалок бўлганларнинг умумий сони 56 кишига етган. Табиий офатларга қарши кураш миллий агентлигининг аниқлик киритишича, энг кўп қурбонлар Мамужу шаҳрида — 47 киши. Мажен шаҳрида 9 киши ҳалок бўлган. «Бундан ташқари, Маженда 637 киши жароҳатланган, шуларнинг 12 нафари жиддий даражада, 200 нафари ўрта оғирлик даражасида ва 425 нафари енгил даража шикастланган. Мамужуда 189 киши жиддий жароҳатлар олган ёки касалхонага ётқизилган», — деди агентлик вакили Радитя Жати.
Зилзила кучли бўлган, аммо 7 сониядан узоқ давом этмаган. Эпимарказ 10 км чуқурликда жойлашган. Ер ости силкинишлари сунамини келтириб чиқармаган.
Минтақа Тинч океани ҳавзасидаги ёриқ чизиқларда, «оловли ҳалқа»да ва вулқонлар ёйида жойлашгани учун, Индонезияда зилзилалар тез-тез бўлиб туради.
Ҳозир Маженда электр таъминоти қисман қайта тикланган. BNPB маҳаллий ҳукумат ва кўнгиллилар билан биргаликда жабрланганларни эвакуация қилишда ва ер ости силкинишлари оқибатларини бартараф этишда давом этмоқда.
Туркияда қурғоқчилик
Туркияда қурғоқчилик сабаб йирик шаҳарлар сувсиз қолиши мумкин. Мутахассисларнинг ҳисоб-китобига кўра, Истанбулни сув билан таъминловчи сув омборида 138 миллион куб метр сув қолган. Бу сув захираси тахминан 45 кунга етиши мумкин. Измир ва Бурсани сув билан таъминловчи сув омборлари мос равишда 36 ва 24 фоизга тўлган. Анқарада сув заҳираси 110 кунга етиши мумкин, деган пойтахт мери Мансур Яваш.
Қурғоқчиликка 2020 йилнинг иккинчи ярмида ёғингарчиликнинг рекорд даражада камайиши сабаб бўлган. Хусусан, ноябрь ойида бир йил аввалгига қараганда 50 фоиз камроқ ёғингарчилик бўлган.
Бундан ташқари, мутахассислар мавжуд вазиятнинг сабаблари сифатида урбанизация жараёнида ўрмонларнинг меъёридан ортиқ кесилиши ва яшил майдонларнинг қисқариши, саноатлаштириш, аҳоли сонининг кўпайиши ва иқлим ўзгаришини кўрсатмоқда.
Ўтган асрнинг 80 йилларидан бошлаб ушбу сабаблар туфайли Туркияда бир неча йирик қурғоқчиликлар бўлган. Муҳандис-кимёгарлар палатаси мутахассислари шаҳар маъмуриятидан аҳоли учун сув меъёрини имкон қадар тезроқ жорий этишни ўйлаб кўришни қатъий тавсия қилмоқда.
Британияда «бразилча» коронавирус штамми
Буюк Британияда коронавирус инфекциясининг «бразилча» штамми билан касалланиш бўйича биринчи ҳолат қайд этилди. Янги COVID-мутацияларини ўрганиш билан шуғулланаётган профессор Венди Барклейнинг сўзларига кўра, инфекциянинг «бразилча» вариантининг иккита тури мавжуд. Улардан бири Британияда қайд этилган.
Вирусологнинг таъкидлашича, афтидан, мазкур штамм мамлакатга «яқинда» кириб келган.
Унинг Бразилиядаги ҳамкасбларига таяниб қўшимча қилишича, янги штаммни юқтириб олган одамларда касалликнинг оғир белгилари кузатилмоқда.
Аввалроқ АҚШнинг Огайо университети олимлари коронавируснинг иккита янги штаммини аниқлаган эди. Қайд этилишича, улардан бири «британча» штаммга ўхшаш, иккинчиси вируснинг янада юқумли бўлишига хизмат қилади.
Буюк Британия ҳукумати коронавируснинг юқумлироқ тури аниқланганини декабрь ойи ўрталарида маълум қилганди. Кейинчалик SARS-CoV-2’нинг ушбу варианти бошқа бир қатор давлатларда аниқланди. ЖССТ маълумотларига кўра, вируснинг ушбу тури дунёнинг 50 дан ортиқ давлатларида аниқланган.
Коронаинфо
Сўнгги маълумотларга кўра, бутун дунё бўйлаб коронавирус оқибатида вафот этганлар сони 2 миллион кишидан ошди.Пандемия бошланганидан буён дунёнинг 191 давлатида касалланиш бўйича 95,1 миллиондан ортиқ ҳолат қайд этилган, 67 миллиондан ортиқ бемор соғайган.
Энг кўп ўлим ҳолатлари АҚШ (405 минг киши), Бразилия (209 минг киши) ва Ҳиндистонда (152 минг киши) қайд этилган.
Касалланиш кўрсаткичи бўйича АҚШ ҳамон етакчи бўлиб турибди — COVID-19’ни юқтириб олиш билан боғлиқ 24 миллиондан ортиқ ҳолат қайд этилган. Иккинчи ўринда Ҳиндистон (10,5 миллион бемор), учинчи ўринда эса Бразилия (8,4 миллион бемор).
Сўнгги вақтларда коронавирусга чалиниш ҳолати кўпайгани боис Токио билан Лондонда фавқулодда ҳолат, Қозоғистон ҳамда Германияда коронавирус туфайли чекловлар кучайтирилди, Ливан ва Шотландияда эса яна карантин жорий этилди. Италияда эса фавқулодда ҳолат режими апрель ойининг охиригача узайтирилди.
Изоҳ (0)