Qozog‘istonda koronavirus tufayli yangi chelovlar kuchga kirdi, deb xabar bermoqda “RBK” mamlakat hukumati saytiga tayanib.

Foto: “TASS”

Hukumat xabarida quyidagilar qayd etilgan:

  • tomosha, sport va boshqa ommaviy tadbirlar, shu jumladan, Yangi yil ertaliklari va bayram korporativlarini o‘tkazish taqiqlandi;
  • epidemiologik vaziyat barqarorlashgunicha Tengiz neft-gaz konida cheklov choralari kuchaytirildi;
  • koronavirusga qarshi dori vositalarining chakana narxlari o‘rtacha 24 foizga pasaytirildi.

Tengrinews mahalliy nashri xabariga ko‘ra, Mang‘istov viloyatida alohida chelovlar kiritilmoqda. Mang‘istov va Atirau viloyati (Tengiz koni shu viloyat hududida joylashgan) chegarasida sanitar post o‘rnatiladi. Bozorlarning ishlash vaqti soat 18:00 gacha, kinoteatrlarniki — 20:00 gacha qisqartiriladi, savdo-ko‘ngilochar markazlar va gipermarketlar soat 22:00 da yopiladi.

Koronavirus tarqalishiga yo‘l qo‘ymaslik bo‘yicha idoralararo komissiya yangi choralarni 2021-yilning yanvar—fevral oylarida o‘tkir respirator virusli infeksiya (O‘RVI) va gripp bilan kasallanish holatlari ortishi fonida koronavirusga chalinish holatlari ko‘payishi xavfi mavjudligi bilan izohladi.

Hukumat majlisida ta’kidlanishicha, ayni paytda Qozog‘istonda yuqumli kasalliklar shifoxonalarida joylarning 28 foizi, reanimatsiyalarda esa — 20 foizi band. Ammo koronavirus tarqalishi bilan bog‘liq vaziyat og‘ir bo‘lib qolayotgan hududlar hali ham bor. Atirau viloyati qizil zona deb belgilandi. Viloyatda dekabr boshida kasallanganlarning ko‘pchiligini Tengiz neft-gaz koni ishchilari tashkil qilgan.

Olmaota, Nur-Sulton shaharlari, Akmola, Qo‘stanoy, Pavlodar, G‘arbiy Qozog‘iston va Shimoliy Qozog‘iston viloyatlari sariq zonaga kirdi.

Jahon sog‘liqni saqlash tashkiloti ma’lumotlariga ko‘ra, Qozog‘istonda koronavirusga chalinganlar soni 193 503 kishiga yetgan. Shularning 2669 nafari vafot etgan. So‘nggi bir kecha-kunduzda 754 kishi virusni yuqtirgan.

Shu bilan birga ta’lim sifatini ta’minlash maqsadida Qozog‘iston Ta’lim va fan vazirligi taklifi va jamoatchilik fikrini hisobga olib, o‘quv yilining 3-choragidan boshlab bitiruvchi sinflar uchun (9, 11, 12-sinflar) sanitar-epidemik talablarga rioya qilgan holda kombinatsiyalashgan o‘qish (70 foiz fanlar an’anaviy ravishda, 30 foizi masofadan o‘qitiladi) joriy qilinadi.