Livan hukumati koronavirus bilan kasallanish darajasi oshgani sababli karantin rejimini joriy etishga qaror qildi, deb xabar bermoqda “Kommersant”.
Foto: Getty Images
Cheklovlar 7-yanvardan 1-fevralgacha amal qiladi. Shuningdek, mamlakatda soat 18:00 dan 05:00 gacha komendantlik soati joriy etiladi.
Livandagi karantin doirasida savdo markazlari, kafe va restoranlar, sport zallari, muzeylar va kinoteatrlar yopiladi. Barcha maktab o‘quvchilari va talabalar masofaviy ta’limga o‘tkazilmoqda. Hukumat, shuningdek, sanitariya-epidemiologiya me’yorlariga rioya etilishi ustidan nazoratni kuchaytiradi.
Livan sog‘liqni saqlash vaziri vazifasini bajaruvchi Hamad Xasanning aytishicha, cheklovlarning kuchayishiga bayramdan keyin tibbiyot muassasalarida yuzaga kelgan keskin vaziyat sabab bo‘lgan. “Biz favqulodda choralar ko‘rishga majbur bo‘lyapmiz, chunki intensiv terapiya bo‘limlari kasallanganlar bilan haddan ortiq to‘lib ketgan”, — degan u.
Livanda 192 mingdan ortiq kishi koronavirus bilan kasallangan, ularning 1,5 mingdan ortig‘i vafot etgan. Livanda bundan avval ham karantin joriy etilgan, u 14-noyabrdan 30-noyabrgacha davom etgandi.
Shotlandiyada ham koronavirus bilan kasallanganlar soni ko‘paygani sababli 5-yanvardan boshlab to‘liq karantin joriy etildi. Mamlakatda bolalar bog‘chalari va maktablari yopilmoqda, chet elga chiqish taqiqlangan. Odamlar uydan faqat oziq-ovqat mahsulotlari, shuningdek hayotiy zarurat bo‘lgan taqdirda chiqishlari mumkin. Cheklov choralari yanvar oxirigacha davom etadi.
Shotlandiyaning birinchi vaziri Nikola Sterjenning aytishicha, hukumat COVID-19 bilan bog‘liq vaziyatni “o‘ta jiddiy” deb hisoblaydi. Mamlakatda kasallanganlar sonini ortib borishi asosan Britaniyada tarqalishni boshlagan koronavirusning yangi turi bilan bog‘liqligini ta’kidlagan.
“Virusning tez tarqaladigan yangi turi kasallanish darajasining sezilarli ortishiga olib keldi. Bizda vaksinalar bor va bizning vazifamiz — ularni iloji boricha tezroq tarqatish. Buning uchun hukumat sifatida qo‘lgan kelgan hamma narsani qilamiz”, — degan Sterjen.
Avval xabar berilganidek, koronavirusning “britancha” shtammi odatdagidan 70 foizga tez tarqalmoqda. 20 dan ortiq davlatlar, shu jumladan O‘zbekiston ham Buyuk Britaniya bilan aviaparvozlarni to‘xtatib qo‘ydi. Britaniya hukumati ham mamlakatda cheklovlarni kuchaytirmoqda.
