Данияда ҳам коронавируснинг «африкача» штамми аниқланди

Данияда Жанубий Африкада аниқланган COVID-19’нинг мутацияга учраган штамми қайд этилди. Бу ҳақда Berlingske нашрига таяниб «РБК» хабар бермоқда.

Вируснинг юқумлироқ тури Зеландия ороли (оролнинг аҳоли зич жойлашган архипелаги)да аниқланган. Ушбу штамм яқинда Дубайдан учиб келган эркакда аниқланган.

Копенгаген университети экспериментал вирусология профессори Алан Рандруп Томсеннинг сўзларига кўра, Данияда COVID-19 мутацияси бемаврид пайдо бўлди.

«Эпидемия нуқтаи назаридан бизда бу турдаги вируснинг пайдо бўлиши учун жуда ёмон вақт, чунки унда ‘британча’ штаммнинг айрим хусусиятлари бор. Биз айни пайтдаги ҳолатимизни янада қийинлаштиришни хоҳламаймиз», — деган Томсен.

Олим Жанубий Африкадан келган коронавирус мутацияси COVID-19’нинг «британча» штамми каби жуда юқумли эканлигини тасдиқлади. Бироқ вируснинг ушбу тури одатдаги вирусдан қанчалик тезроқ тарқалиши мутахассисларга ҳозирча номаълум. Шунга қарамай, Томсеннинг фикрича, Жанубий Африка штаммининг пайдо бўлиши Данияда касалликнинг қайтадан авж олишига олиб келмайди.

Мамлакатда декабрь ойи охирларида коронавируснинг «британча» штамми аниқланганди.

Жонс Ҳопкинс университети маълумотларига кўра, 17 январь ҳолатига кўра Данияда 189 мингдан ортиқ кишида COVID-19 аниқланган. Уларнинг 169 мингдан ортиғи соғайган, 1,7 мингдан ортиғи вафот этган.

Аввалроқ Британияда коронавируснинг «бразилияча» штамми аниқлангани ҳақида хабар берилган эди.