Коронавируснинг янги мутациялари, шу жумладан, яқинда Японияда қайд этилган тури ҳозирча касалликнинг кечиш оғирлигига таъсир ўтказмайди. Бу ҳақда Жаҳон соғлиқни сақлаш ташкилоти (ЖССТ) директори Тедрос Гебрейесус брифингда маълум қилди, деб ёзади «РБК».
«Ўтган дам олиш кунлари Япония ЖССТга вируснинг янги варианти аниқлангани ҳақида хабар берди. Вирус қанчалик кўп тарқалса, унинг турлари пайдо бўлиши учун шунчалик кўп имкониятлар юзага келади», — деди у.
ЖССТ директорининг қайд этишича, ҳозирча аниқланган мутациялар COVID-19’нинг оғирлик даражасини оширмайди.
Гебрейесус огоҳлантиришича, янги штаммларнинг пайдо бўлиши шундоқ ҳам босим остида қолган соғлиқни сақлаш тизимининг ишини қийинлаштиради. У одамлардан тавсия этилган эҳтиёт чораларига риоя қилишни сўради, чунки агар вирус камроқ тарқалса, унинг мутацияга учраш эҳтимоли ҳам камроқ бўлади.
Японияда янги штаммни юқтириб олган тўрт киши қайд этилди, улар Бразилиядан келган. Юқумли касалликлар миллий институтида маълум қилишларича, ҳозирча штамм юқумлироқ эканлиги борасида далиллар йўқ. Айни вақтда институт раҳбари Такадзи Вакита хабар қилишича, бу мутация коронавируснинг Буюк Британия ва Бразилияда тарқалаётган юқумлироқ турларига ўхшаш жиҳатларга эга.
Изоҳ (0)