Демократлар Дональд Трамп маъмурияти аъзоларига босим ўтказиб, уни 20 январда президентлик муддати тугашидан олдин лавозимидан четлатишга эришмоқчи. Бунинг қанчалик имкони бор ва демократларда яна қандай вариантлар бор? Шу саволларга «РБК» жавоб топишга уринди.
Демократларнинг Трампни сиқиб чиқариш учун иккита ташаббуси
АҚШ Конгресси вакиллар палатасидаги Демократик партиянинг етакчи сиёсатчилари амалдаги президент Дональд Трампга нисбатан импичмент тўғрисидаги резолюция лойиҳасини эълон қилди. Республикачининг ваколатлари 20 январь — ноябрдаги сайловларда ғолиб бўлган демократ Жо Байденнинг инаугурацияси куни тугайди, аммо конгрессдаги сиёсатчилар Трампни ушбу муддатгача четлатиш зарур деб ҳисоблайди. Трампнинг рақиблари фикрича, унинг сайловдаги мағлубиятини тан олишдан бош тортиши ва тарафдорларини гижгижлаши конгресс биносига ҳужум уюштирилишига олиб келди. Резолюция вакиллар палатасига киритилди. АҚШ Конституциясига киритилган 14-тузатишнинг 3-бўлими «қўзғалон ёки исёнда» қатнашган шахсга АҚШда қандайдир лавозимни эгаллашни тақиқлайди, мана шу импичмент учун асосдир, дейилади резолюцияда.Айни пайтда вакиллар палатаси спикери Нэнси Пелоси айтишича, импичмент — бу энг сўнгги чора, ва демократлар Трамп Конституцияга киритилган 25-тузатишга мувофиқ лавозимидан туширилишига умид қилмоқда. Унга кўра, амалдаги президент вице-президент ва маъмуриятдаги кўпчилик асосий лавозимлар қарори билан ўз лавозимидан четлатилиши мумкин. Улар Трамп ўз вазифаларини бажаришни давом эттира олмаслиги ҳақида қарор чиқариши керак бўлади. Маҳкама таркибига давлат раҳбари ва вице-президент Майк Пенсдан ташқари, ижро этувчи ҳокимиятнинг яна 15 вакили, шу жумладан, давлат котиби Майкл Помпео ва молия вазири Стивен Мнучин ҳам киради. Пелосининг сўзларига кўра, у Пенсни энг яқин вақтда президентни 25-модда бўйича четлатишга чақирувчи резолюция киритмоқчи. Аммо Пенснинг ўзи Трампни лавозимидан кетказиш масаласини қўймоқчи эмас, деб ёзади The Wall Street Journal газетаси вице-президентга яқин манбаларга таяниб.
Агар Пенс Трампни лавозимидан четлатиш учун Вазирлар Маҳкамасини чақирмаса, унда демократлар 11 январь, душанба куни тақдим этилган импичмент тўғрисидаги резолюция асосида президент импичментига эришишга уринади, у 13 январь, чоршанба куни кўриб чиқиш учун киритилиши мумкин.
Импичмент одатда қандай кечади?
Импичмент жараёнини вакиллар палатаси бошлайди. Аммо импичмент масаласига овоз бериш учун палатага киритишдан олдин қандай жараёнларга риоя қилиш кераклиги ҳақидаги аниқ қоидалар қонунларда ёзилмаган. Амалиётга кўра, дастлаб қуйи палата аъзолари импичмент жараёнини ишга тушириш ҳақида резолюция қабул қилади. Сўнг вакиллар палатаси қўмитаси импичмент қабул қилиш учун асосларни ўрганиб чиқиши керак. Қоидага кўра, бундай текширувни ҳуқуқий ишлар бўйича қўмита ўтказади. Президентга нисбатан айбловлар ўрганиб чиқилганидан кейин вакиллар палатаси қўмитаси асосларнинг етарли ёки етарли эмаслиги ҳақида қарор қабул қилади. Агар қўмитанинг кўпчилик аъзолари асосларни етарлича деб ҳисобласа, президентга қарши айбловларнинг битта ёки бир нечта бандлари бутун вакиллар палатаси кўриб чиқиши учун киритилади. 2019 йил декабрда вакиллар палатасининг ҳуқуқий қўмитаси президентга қарши иккита — ҳокимиятни суиистеъмол қилиш ва Конгресс текширувига тўсқинлик қилиш айбловларидан иборат резолюцияни бутун палата овоз бериши учун киритилишини ёқлаб овоз берган эди. Қўмитада 23 конгрессмен (ҳаммаси демократлар) ёқлаб овоз берган бўлса, 17 нафари (ҳаммаси республикачилар) қарши чиққан.Ҳуқуқий масалалар бўйича қўмитада маъқулланганидан кейин импичмент бўйича резолюция вакиллар палатасининг жами таркиби овоз бериши учун киритилади. Кўпчилик томонидан қўллаб-қувватланиши керак. 2019 йил декабрида қуйи палатада 228 конгрессмен (бир нафар мустақилдан ташқари барчаси демократлар) импичментни ёқлаб, 193 киши эса (бир демократдан ташқари барчаси республикачилар) унга қарши овоз берганди.
Бу сафар демократлар айблов бандлари бўйича бир қарорга келди ва бирданига палатанинг бутун таркиби билан овоз беришга ўтмоқчи. Шундан кейин импичмент жараёни Сенатда давом этади.
Айнан сенаторлар президентнинг айбдорлиги ва четлатилиши масаласини ҳал қилади. У ерда айбловлар бўйича эшитувлар бўлиб ўтади. Бир йил аввал кўпчилик ўрин республикачиларда бўлган сенат импичментга қарши овоз берган эди. Биринчи айблов бўйича 48 сенатор Трампни айбдор деб, 52 нафари эса айбсиз деб ҳисоблаган эди. Иккинчи айблов бўйича 47 сенатор президентни айбдор деб топди, 53 нафари — айбсиз. Январь бошида ишга киришган конгресснинг жорий таркибида мувозанат кескин ўзгарган — иккала палатада ҳам демократлар кўпчилик ўринга эга.
Импичмент жараёни одатда анча узоқ давом этади. Трампнинг биринчи импичменти уч ойдан кўпроқ вақт олиб, 2019 йил октябрь охиридан (вакиллар палатаси томонидан тегишли резолюция қабул қилинган вақт) 2020 йил 5 февралгача (у оқланган вақт) давом этганди. Бу сафар президентни лавозимидан бўшатиш ташаббускорларида вақт жуда кам. Агар 13 январь, чоршанба куни вакиллар палатаси таркибидаги кўпчилик импичментни ёқлаб овоз берган тақдирда ҳам, сенаторлар ишни Байденнинг инаугурациясигача кўриб чиқишга улгурмаслиги мумкин. 19 январгача Сенат режа бўйича мажлислар ўтказмайди, аммо унинг янги таркиби қасамёд қабул қилиб бўлган. Мажлисга йиғилиш учун барча сенаторларнинг розилиги керак. Президентни айбдор деб топиш ва уни четлатиш учун овозларнинг учдан икки қисми, яъни 100 тадан 67 таси керак. Сенатда демократларнинг 50 та овози бор, яъни республикачиларнинг 17 та овози керак бўлади, уларни қўлга киритиш эса осон бўлмайди.
Изоҳ (0)