Париждаги Елисей майдони йирик реконструкция ишлари доирасида «ноодатий боғ»га айлантирилади. Бу ҳақда шаҳар мери Анн Идальгога таяниб, The Guardian хабар бермоқда.
Унинг сўзларига кўра, марказий проспектни ўзгартиришга 250 миллион евро сарфланади. 1,9 километр узунликдаги ишлар Париждаги 2024 йилги ёзги Олимпия ўйинларидан сўнг бошланади.
«Афсонавий хиёбон сўнгги 30 йил ичида ўз кўркини йўқотди. Парижликлар аста-секин ундан воз кечмоқда. Бир неча инқирозлар оқибатида қаровсиз қолди», — дейилади ушбу проспект ва унга туташ ҳудудларни капитал таъмирлаш ташаббусини билдирган Елисей майдони қўмитаси баёнотида.
Қўмита президенти Жан-Ноэль Рейнхардт Елисей майдони дунёдаги энг чиройли хиёбонлардан бири ҳисобланса-да, французлар учун у «эскиргандек» кўринишини 2019 йилдаёқ таъкидлаган.
Қўмита хиёбонни ободонлаштириш бўйича жамоатчилик муҳокамаларини ўтказган. Режалар доирасига автомобиллар майдонини икки бараварга қисқартириш, кўчаларни пиёдалар ҳаракатланиши учун яшил майдонларга айлантириш, ҳаво тозалигини ошириш учун дарахтлардан иборат туннеллар яратиш ҳам киритилган.
Елисей майдонини реконструкция қилиш режаси архитектор Филипп Кьямбаретта ва унинг PCА-Stream студияси томонидан ишлаб чиқилган. Унинг таъкидлашича, таъмирлаш ишларидан сўнг хиёбон «экологик, инклюзив ва кўнгилдагидек» бўлиши керак.
Режа доирасида, шунингдек, проспектнинг жануби-шарқидаги машҳур Розилик майдонини реконструкция қилиш ҳам кўзда тутилган. Елисей майдонидаги ишларни 2030 йилгача якунлаш режалаштирилмоқда.
Изоҳ (0)