Россиянинг Ўзбекистоннинг айрим қишлоқ хўжалиги маҳсулотларига тақиқ қўйишига сабаб бўлган ташхис нотўғри бўлиб чиқди. Бу ҳақда Ўсимликлар карантини давлат инспекцияси ахборот хизмати раҳбари Дурдона Очилова 11 январь, душанба куни бўлиб ўтган брифингда маълум қилди.
Қашқадарё ҳамда Навоий вилоятларидан помидор ҳамда қалампир, Фарғона вилоятидан барча маҳсулотларнинг импортига Россия томонидан тақиқ қўйилган эди.
Брифингда маълум қилинишича, тақиқ эълон қилинган куни мазкур касалликни аниқлаш учун Ўсимликлар карантини давлат инспекцияси марказий аппарати, ўсимликлар карантини илмий маркази ҳамда марказий карантин лабораториясидан иборат махсус ишчи гуруҳи ҳудудларга сафарбар этилди. Инспекция раҳбарияти «Росселхознадзор» вакиллари билан музокаралар ўтказиб, уларнинг тажрибавий тавсияларини инобатга олган ҳолда, помидор ва булғор қалампири маҳсулоти ҳамда унинг экспортига жиддий зарар етказувчи ушбу касалликнинг аломатлари, тарқалиш йўллари ва қарши кураш механизми аниқ белгилаб олинди.
Республиканинг вирусдан холи эканлигини тасдиқлаш мақсадида нафақат Қашқадарё, Навоий, Фарғона, балки ҳар бир ҳудуд кесимида маҳсулот етиштирилувчи иссиқхоналарнинг жойлашган ўрни, майдони, тури ва фитосанитар тозалиги тўғрисидаги маълумотномаси, яъни паспорти шакллантирилиб, Россия томонига тақдим этилди.
Хусусан, Фарғона вилоятида бугунги кунда мавжуд иссиқхоналарнинг 99,11 гектар майдонини помидор экинлари ташкил этиб, уларнинг барчаси саноат иссиқхоналари ҳисобланади. Шундан 36,46 гектарни ташкил этган 18 та иссиқхонада помидор етиштирилиши давом этмоқда. Республика бўйлаб ўтказилган махсус фитосанитар дала назорати чоғида барча иссиқхона раҳбар ва ходимларига касаллик ва зараркунандалар ҳамда помидорнинг жигарранг бужмайиш вируси касаллиги ҳақида тушунтириш ишлари олиб борилди.
Халқаро мутахассислар ҳамкорлигида олиб борилган ўрганишлар натижасида айтишим мумкинки, ҳозирга қадар Ўзбекистонда «Помидор жигарранг бужмайиш вируси касаллиги»нинг ташқи симптоматик аломатлари қайд этилмади.
Инспекция ходимлари томонидан олиб борилган қатъий фитосанитар текширувлар, шунингдек, «Ўздавкарантин» ҳамда «Росселхознадзор» ўртасидаги музокаралар натижасида 2020 йилнинг 18 декабридан бошлаб Фарғона вилоятида жойлашган 7 та корхонадан помидор ва қалампир маҳсулотларини, 2021 йилнинг 1 январдан бошлаб эса Қашқадарё ва Навоий вилоятларидан 34 та корхона помидор маҳсулотини, Фарғона вилоятидан қуритилган маҳсулотларнинг Россияга экспорт қилинишига рухсат олинди.
Эслатиб ўтамиз, Фарғонага вилояти ҳокими Хайрулло Бозоров Россияга юборилган помидордан чиққан касаллик Фарғонадаги бирорта иссиқхонада аниқланмаганини айтган эди. Ҳокимнинг Россиянинг ваколатли органлари томонидан Фарғонада етиштирилган барча қишлоқ хўжалиги маҳсулотлари импортига қўйилган тақиқ вилоятга жуда салбий таъсир кўрсатишини таъкидлаб, тақиқ олиб ташланмаса, «Фарғонага оғир бўлишини» айтганди.
«Юксалиш» умуммиллий ҳаракати етакчиси, Олий Мажлис Қонунчилик палатаси депутати Бобур Бекмуродов Россия томонидан Фарғона, Навоий ва Қашқадарё вилоятларида етиштирилган қишлоқ хўжалиги маҳсулотлари импортига қўйилган тақиққа муносабат билдириб, «бундай ҳаракатлар Жаҳон савдо ташкилотига аъзоликни тезлаштириш лозимлигини яна бир бор эслатаётгани»ни таъкидлаб ўтган эди.
Telegram’даги «Давлетовуз» канали эса Ўзбекистон қалампири ва помидорига қарши Россия томонидан қўйилаётган тақиқлар «Ўзбекистон ҳукумати Россия вакцинасини расман (худди Қозоғистон каби) сотиб олмаётгани ёки ‘маҳаллийлаштирмаётгани’ туфайли» жорий этилаётган бўлиши мумкинлигини айтганди.
Изоҳ (0)