Rossiya O‘zbekistondagi 34 ta korxonadan pomidor olib kirilishiga ruxsat berdi

2021-yil 1-yanvardan boshlab Rossiyaga Navoiy va Qashqadaryo viloyatlaridagi 34 korxonadan pomidor olib kirilishiga ruxsat berildi. Bu haqda “Rosselxoznadzor” saytida ma’lum qilindi. Ruxsat Vazirlar Mahkamasi huzuridagi O‘simliklar karantini davlat inspeksiyasi kafolati ostida berilgan.

Ma’lum qilinishicha, ushbu qaror “O‘zdavkarantin” pomidor jigarrang bujmayishi virusi aniqlanmagan korxonalar to‘g‘risidagi ma’lumotni taqdim etganidan so‘ng qabul qilingan.

Shuningdek, ma’lumot berilishicha, Ozarbayjondagi 15 ta korxonadan ham pomidor olib kirilishiga ruxsat berilgan.

Avvalroq “Rosselxoznadzor” Rossiya hududiga Farg‘ona viloyatida joylashgan 7 ta korxonadan pomidor va qalampir mahsulotlari olib kirishga ruxsat bergandi.

Eslatib o‘tamiz, jigarrang burishgan virusi aniqlangani sababli “Rosselxoznadzor” 26-noyabrdan boshlab Farg‘ona viloyatidan Rossiyaga pomidor va qalampir olib kirishni taqiqlagan edi. Keyinroq quritilgan o‘rik partiyasida ham xavfli zararkunanda (kapr qo‘ng‘izi) aniqlangach, “Rosselxoznadzor” Farg‘onadan barcha turdagi o‘simlik mahsulotlari importini taqiqladi. Rossiya tomoni shu kabi taqiqlarni so‘nggi ikki hafta ichida Navoiy va Qashqadaryo viloyatida yetishtirilgan mahsulotlarga ham joriy etgan.