Андижон шаҳрига ичимлик суви етказиб берувчи Хонобод—Андижон марказий сув қувурининг Андижон тумани «Хортум» маҳалласида жойлашган сув тақсимлаш жиҳозида 9 январь, шанба куни носозлик юзага келиб, бутун шаҳар ичимлик сувидан узилганди. «Ўзсувтаъминот» АЖ матбуот хизмати бунга нима сабаб бўлганини маълум қилди.
Қайд этилишича, диаметри 1400 миллиметр бўлган Хонобод—Андижон марказий ичимлик суви қувурининг сув тақсимлаш зулфини (задвижка) об-ҳавонинг кескин совиб кетиши натижасида ёрилиб, фавқулодда носозлик юзага келган.
Шу сабабли Андижон шаҳри, Олтинкўл ва Андижон туманининг 20 дан ортиқ маҳаллаларида сув таъминоти вақтинча тўхтатилган.
Ҳолатни бартараф этиш мақсадида Андижон вилояти ҳокимлиги, «Ўзсувтаъминот» акциядорлик жамияти ва «Андижон сув таъминоти» МЧЖ томонидан тезкор чора-тадбирлар белгиланиб, махсус штаб ташкил қилинган.
Бундан ташқари, Андижон вилояти Фавқулодда вазиятлар бошқармаси, Ички ишлар бошқармаси, «Электр тармоқлари корхонаси», «Ҳудудгазтаъминот», Уй-жой коммунал хизмат кўрсатиш бошқармаси, Автомобиль йўллари бошқармаси, тиббиёт ва бошқа ташкилотларнинг 120 нафар ходими ҳамда 15 та махсус техника жалб этилган.
Эслатиб ўтамиз, авария оқибатида Андижон шаҳри тўлиқ, Андижон ва Олтинкўл туманларининг бир қисми ичимлик суви таъминотидан узилган. Ушбу носозлик оқибатида 11—12 январь кунлари ҳам аҳолига сув етказиб беришда узилиш юзага келиши мумкин. Шу муносабат билан «Андижон сув таъминоти» шаҳар аҳолисини ичимлик суви захирасини яратиб олишга чақирган. «Андижон бугун» Telegram каналида эса шаҳар аҳолиси дўконлардан кўплаб миқдорда ичимлик суви сотиб олаётгани акс этган видеоёзув эълон қилинган.
Андижондан сўнг 11 январь куни Наманганда ҳам айрим ҳудудлар ичимлик сувидан узилди. Шаҳардаги ушбу носозлик 11 январь куни соат 18:00 гача бартараф этилиши маълум қилинди.
Ундан аввал эса Қашқадарёда электр узилишлари сабабли сув таъминоти тўхтаганди.
Изоҳ (0)