Ўзбекистонда 11 январь, душанба куни очиқ ва жуда илиқ об-ҳаво сақланиб туради, деб хабар бермоқда «Ўзгидромет».
Қайд этилишича, кундуз куни ҳаво ҳарорати 7—12 даража илиққача исийди, бу меъёрдан 4—5 даражага юқоридир. Республика бўйича илиқ ҳаво массалари кириб келишида баъзи жойларда шамол 15—20 метр/секундгача кучайиши мумкин.
12 январь, сешанба куни республика ҳудудларининг кўп қисмида қуруқ ва илиқ об-ҳаво бўлиши кутилмоқда, шунингдек, баъзи жойларда шамол 15—20 метр/секундгача кучайиши мумкин. Ҳаво ҳарорати кечаси 2 даража совуқ—3 даража илиқни, кундуз куни 5—10 даража илиқни ташкил этади. Фақат республиканинг шимолий ҳудудларига Кавказ ҳудудларидан салқин ва бироз нам ҳаво массалари кириб келиши кутилмоқда. Қорақалпоғистон Республикаси ва Хоразм вилоятининг баъзи жойларида бироз ёғингарчилик (ёмғир, қор) бўлиши мумкин.
13 январь, чоршанба куни ҳаво массаларининг кириб келиш фронти шарққа қараб силжийди, кечалари Тошкент вилоятида, шунингдек, Тошкент, Наманган вилоятларининг тоғолди ва тоғли ҳудудларининг баъзи жойларида бироз ёғингарчилик (ёмғир, қор) бўлиши мумкин. Республиканинг қолган ҳудудларида ёғингарчилик кутилмайди. Ҳаво ҳарорати кечаси 2 даража совуқ—3 даража илиқни, кундуз куни 3—8 даража илиқни ташкил этади, бу иқлимий меъёрлардан деярли кам бўлади.
14 январь, пайшанба куни Ўзбекистонда ёғингарчиликсиз об-ҳаво бўлиши кутилмоқда. Ҳаво ҳарорати кечаси 0—5 даража совуққача пасаяди, кундузи эса кўтарилади ва 5—10 даража илиқ атрофида бўлади.
15 январь, жума куни эса республика бўйича Эрондан жуда илиқ ҳаво массалари кириб келиши бошланади, Ўзбекистонда қуруқ об-ҳаво бўлиши кутилмоқда ва ҳаво ҳарорати кечаси 2—5 даража илиққача, баъзи жойларда айниқса совуқ кучли бўладиган ҳудудларда 0—2 даража совуққача, кундузи 10—15 даража иссиққача кўтарилади, бу меъёрдан 5—7 даражага юқоридир.
Бутун иш ҳафта давомида республиканинг баъзи жойларида туманлар кузатилади.
Изоҳ (0)