АҚШда Капитолийга шиддатли ҳужумдан кейин ички терроризм бўйича 25 та иш қўзғатилди

АҚШ Конгресси биносидаги тартибсизликлардан кейин ички терроризм бўйича камида 25 та иш қўзғатилди. Бу ҳақда Вакиллар палатаси аъзоси Жейсон Кроу армия вазири Райан Маккарти билан суҳбатдан сўнг маълум қилди, деб ёзади Meduza.

Шунингдек, Кроунинг баёнотида айтилишича, Капитолийга уюштирилган шиддатли ҳужум иштирокчиларида стволли ўқотар қурол, «Молотов коктейллари», портловчи қурилмалар ва пластик кишанлар борлиги аниқланган.

Аввалроқ Капитолийга ҳужум муносабати билан 80 дан ортиқ киши ҳибсга олингани ҳақида АҚШ ҳукумати маълум қилганди. Уларнинг 50 дан зиёдига турли айбловлар, шу жумладан, комендантлик соатини бузганлик, ноқонуний бостириб кирганлик, қурол ва ўқ-дориларни ноқонуний олиб юриш айбловлари эълон қилинган.

Эслатиб ўтамиз, АҚШда 3 ноябрь куни бўлиб ўтган президент сайловлари натижаларини сайловчилар ҳайъати 15 декабрь куни қўллаб-қувватлаб, демократлардан номзод Жо Байденни ғолиб деб эълон қилди. Конгресс якунларни 6 январь куни тасдиқлаши керак эди. Бунга сайловда мағлуб бўлган президент Дональд Трампнинг тарафдорлари халақит берди: улар Конгресс биноси ёнида йиғилиб, ичкарига бостириб кирди. Полиция уларни фақат куч билан қувиб чиқара олди.

Конгрессменларнинг бир қисми Капитолийдан эвакуация қилинди. Вашингтонда комендантлик соати эълон қилиниб, тартибни сақлаш учун АҚШ пойтахтига Миллий гвардия кучлари киритилди. Тўқнашувларда беш киши ҳалок бўлди.

Кейинроқ, 7 январь куни АҚШ Конгресси мажлисини давом эттириб, Жо Байденнинг АҚШнинг 46-президенти этиб сайланганини тасдиқлади ва унинг инаугурациясини 20 январга белгилади. Трамп овоз бериш якунларидан ҳамон норози бўлса-да, ваколатларни сайланган президентга топширишга тайёрлигини эълон қилди.

Бир қатор демократ сиёсатчилар Трампни ўз тарафдорларини зўравонликка гижгижлашда айблади. Амалдаги АҚШ президенти энг йирик ижтимоий тармоқларда вақтинчалик ёки доимий равишда блокланди, унинг маъмуриятидаги ўнга яқин ходим истеъфо берди.

Вакиллар палатаси спикери, Демократлар партияси аъзоси Нэнси Пелоси вице-президентдан Трампни ҳокимиятдан четлатишни талаб қилди. Акс ҳолда Пелоси Трампга нисбатан импичмент жараёнини бошлаш билан таҳдид қилди.