Қирғизистон Марказий сайлов комиссияси (МСК) маълумотларига кўра, президент сайловларида етакчилик қилаётган Қирғизистон собиқ бош вазир вазифасини бажарувчи Садир Жапаров матбуот анжумани чоғида Россия билан алоқалар ҳақида гапириб берди, деб ёзади «РБК».
«Россия бизнинг бош стратегик шеригимиз бўлган ва шундай бўлиб қолади», — деди у.
97,98 фоиз овозлар ҳисоблаб чиқилганидан кейин МСК Садир Жапаров муддатидан илгари президент сайловларида 79,2 фоиз овоз билан етакчилик қилаётганини маълум қилди. Дастлабки маълумотларга кўра, иккинчи ўринда 6,69 фоиз овоз билан Адахан Мадумаров, учинчи ўринда — 2,38 фоиз овоз билан Бабиржан Толбаев бормоқда.
10 январь, якшанба куни Қирғизистон президенти лавозими учун бўлиб ўтган муддатидан илгари сайловларда жами 17 номзод кураш олиб борди. Қолганлар 0,08 дан 1,4 фоизгача овоз тўплаган. Сайловда сайловчиларнинг 39,75 фоизи қатнашган.
Мамлакатда муддатидан илгари сайловлар билан бирга, бошқарув шакли ҳақида референдум ҳам бўлиб ўтди. Овоз бериш бюллетенига учта вариант киритилди: президентлик бошқаруви, парламент бошқаруви ёки иккала вариантга ҳам қаршилик. МСК маълумотларига қараганда, референдумда қатнашганларнинг 80,99 фоизи бошқарувнинг президент шаклига овоз берган. Референдумга сайловчиларнинг 39,88 фоизи келган.
Сайловларнинг якуний натижалари барча бюллетенлар қўлда санаб чиқилганидан кейин эълон қилинади.
Садир Жапаровнинг баъзи рақиблари эса сайловнинг дастлабки натижаларидан норози бўлиб, уларни тан олмаслигини билдирди. Хусусан, «Бутун Қирғизистон» партияси етакчиси Адахан Мадумаров электрон сайлов қутилари билан боғлиқ қалбакилаштиришлар ҳақида маълум қилди ва овоз бериш якунларини тан олишдан бош тортди. «Мен сайлов якунларини тан олмайман. Бугунги вазият номақбул. Текшириш ниқоби остида махсус хизматлар ходимлари келди. Улар ўзлари билан флешка олиб юрганди», — деди Мадумаров.
Миллий хавфсизлик қўмитаси собиқ раҳбари Абдил Сегизбаев ҳам сайлов натижалари юзасидан эътироз билдирмоқчи. «Табиийки, ўтган йил октябрида ҳокимиятни эгаллаб олганлар маъмурий ресурслардан фойдаланишга уринди, биз буларнинг барчасини кўрдик. Ҳатто бу ишга касалхоналар, мактаблар ходимларини ҳам жалб қилишга уринишди», — деди у. Сегизбаевнинг таъкидлашича, сайловлар қалбакилаштирилган.
Қирғизистондаги президент сайлови муддатидан аввал ўтказилди – бу сайловнинг ўтказилиши 2020 йил октябрида, парламент сайловларидаги эҳтимолий қоидабузарликлар сабаб бошланган тартибсизликлар туфайли аввалги давлат раҳбари Сўронбой Жээнбеков истеъфо бергач эълон қилинган эди.
Садир Жапаров октябрдаги тўполонларга қадар тартибсизликлар келтириб чиқаришда айбланиб, 10 йиллик озодликдан маҳрум қилиш жазосини ўтаётган эди. Намойишчилар босими остида у қамоқдан озод қилинди, эртасига эса парламент томонидан бош вазир этиб тайинланди. Жээнбековнинг истеъфосидан кейин эса у президент вазифасини бажарувчига айланган эди.
Изоҳ (0)