БМТ бош котиби Антониу Гутерриш ташкилотнинг биринчи мажлиси ўтказилган кунга бағишланган тадбирда кириб келган йилни 1945 йилга қиёслади, деб хабар бермоқда «РБК».
«Биз 1945 йилдагидек бир фурсатни бошдан кечирмоқдамиз. Аммо бу 1945 йил эмас», — деди Гутерриш айни пайтда коронавирус ва бошқа синовларга қарши уруш олиб борилаётганини таъкидлаб: «Эртага кибермаконда террорчиларга қарши кураш ҳам бошланиши мумкин. Ва биз иқлим ўзгаришига қарши узоқ давом этаётган урушда ҳамон мағлуб бўляпмиз».
БМТ бош котиби халқаро ҳамкорликка бўлган зарурият сақланиб турганини ҳам қайд этди. Унинг сўзларига кўра, коронавирус пандемияси бу соҳада жиддий муаммоларни кўрсатиб қўйган: дунё «вакцина национализми» деган воқеликка дуч келган, бу бой мамлакатларнинг ўз фуқаролари учун дорилар сотиб олиш борасида рақобатлашишидан иборат. У Жаҳон соғлиқни сақлаш ташкилотининг (ЖССТ) ночор мамлакатларнинг 2 миллион доза арзон вакцина олишини таъминлайдиган COVAX лойиҳасини қўллаб-қувватлаган Буюк Британия ҳукуматига миннатдорлик билдирди.
Гутерриш дунёда «вакцина национализми» пайдо бўлгани ҳақида аввал ҳам гапирган. Чунончи, декабрда ночор мамлакатларда яшовчи одамлар ривожланган мамлакатларда коронавирусга қарши вакцинага тайёргарлик бораётганини кузатиб, уларнинг ўзлари қачондир эмланиши ҳақида саволлар бераётганини айтганди. ЖССТ раҳбари Тедрос Гебрейесус ўз навбатида вакциналарга сайёранинг ҳар бир фуқаросининг қўли етадиган «глобал жамоатчилик манфаати» деб қарашга чақирди.
Аввалроқ БМТ бош котиби Антонио Гутерриш 2021 йилни коронавирус пандемияси оқибатидан халос бўлишга бағишлашга чақирган эди.
«Келинглар, ўзаро ва табиат билан муросага келиб, иқлим инқирозини енгамиз. COVID-19 тарқалишини тўхтатиб, 2021 йилни тикланиш йили қиламиз», — деган Гутерриш.
У гап пандемия оқибатларини тугатиш, «қулаган иқтисодиёт ва жамиятни» ривожлантириш, бўлинишларни бартараф этиш ва «сайёрамизни тиклаш учун ҳаракатни бошлаш» ҳақида кетаётганини қайд этган.
Изоҳ (0)