Корея Республикаси президенти Мун Чжэ Ин 11 январь, душанба куни мамлакатнинг барча фуқаролари коронавирусга қарши бепул эмланишини эълон қилди, деб хабар бермоқда «Интерфакс». Бу жараён келаси ойдан бошланиши керак.
Ўзининг янги йил мурожаатида президент 2021 йил коронавирус туфайли юзага келган инқироздан кейин «қайта тикланиш», ижтимоий тенгсизликни камайтириш учун «инклюзивлик» ва Жанубий Кореяни етакчи мамлакатга айлантириш томонга қўйилган олға қадам бўлишини айтганди.
11 январь, душанба куни ҳолатига кўра Жанубий Кореяда сўнгги бир кеча-кундузда 451 киши COVID-19’га чалинган. Бу якшанба (665), шанба (641) ва жума (674) кунларига нисбатан камроқ (бу дам олиш кунлари тестлар камроқ топширилгани билан боғлиқ бўлиши ҳам мумкин). Жами касалланиш ҳолатлари 69,1 мингга, коронавирусга боғлиқ сабаблардан вафот этганлар 1140 кишига етди.
COVID-19’ни юқтириб олиш билан боғлиқ 1000 дан ортиқ ҳолат қайд этилган 3 январдан буён пасайиш кузатилмоқда. Бунга 17 январгача жорий қилинган ижтимоий масофаланиш бўйича чоралар имконият яратди.
The Korea Times ёзишича, 2021 йил Жанубий Кореяда гриппга чалиниш даражаси ўтган мавсумга нисбатан анча паст.
Мамлакатда 11 миллион киши гриппга қарши бепул эмланди. Аммо бунда коронавирусга қарши ҳимоя чоралари — ниқоб тақиш, масофаланиш ва шахсий гигиенанинг кучайтирилиши катта рол ўйнаган бўлиши мумкин, дея қайд этди экспертлар.
Сеул Pfizer ва Janssen компаниялари билан коронавирусга қарши вакциналар етказиб бериш ҳақида битим тузганини Жанубий Корея бош вазири Чон Сё Гюн 2020 йил декабрида маълум қилган эди. Pfizer 10 миллион, Janssen 6 миллион кишини эмлашга етадиган вакцина етказади. Кейинроқ Жанубий Корея президентининг офиси хабар қилишича, Moderna компанияси мамлакатга 20 миллион киши учун вакцина дозаларини етказиб беради.
Мавзуга доир:
Изоҳ (0)