AQSh vakillar palatasi spikeri Nensi Pelosi amaldagi prezident Donald Trampning Amerika federal muassasalariga uyushtirilgan va Vashington fikricha, Moskvaga aloqador bo‘lgan ommaviy xakerlar hujumiga nisbatan harakatsizlik ko‘rsatayotganini tanqid qildi. Bu haqda “RBK” xabar bermoqda.

“Xakerlik hujumiga kelsa, u bu haqda hech narsa demadi”, — dedi Pelosi CBS’ga bergan intervyusida. Jurnalist bunga javoban Tramp hujumga Xitoy aloqador bo‘lishi mumkinligi haqida gapirganini eslatdi.

Pelosining taxmin qilishicha, Amerika prezidentining bunday munosabati Rossiyada uni obro‘sizlantiruvchi materiallar borligiga bog‘liq bo‘lishi mumkin. “Ruslarda prezident Trampga nisbatan nima borligini bilmayman — shaxsiy, siyosiy yoki moliyaviy ma’lumotmi… Ammo u nima uchun bu darajada Putinga xizmatkorlik qilishini izohlaydigan boshqa narsa yo‘q”.

Pelosining so‘zlariga ko‘ra, hozir AQShda hokimiyat tepasida “jinoiy ish qo‘zg‘atiladigan darajada jiddiy narsaga qo‘l urgan” odam turibdi. Uning fikricha, Tramp o‘z tarafdorlarini qo‘zg‘alonga gijgijlaganlikda aybdor. Shuningdek, vakillar palatasi spikeri Konstitutsiyaga kiritilgan 25-tuzatishdan foydalanish g‘oyasi yoqib tushganini aytdi. 25-tuzatish vitse-prezident va prezident ma’muriyatining katta qismi amaldagi davlat rahbarining layoqatsizligini tasdiqlagan taqdirda, hokimiyatning avtomatik ravishda vitse-prezidentga topshirilishini ko‘zda tutadi.

Nensi Pelosi ma’lum qilishicha, 11-yanvar kuni Amerika Kongressining vakillar palatasi vitse-prezident Mayk Pensga qaratilgan hokimiyatdan amaldagi davlat rahbari Donald Trampni chetlatishga chaqiruvchi rezolyutsiyani ko‘rib chiqishni boshlaydi.

Hujjat Pensni “prezidentni o‘z xizmat majburiyatlarini bajarish uchun layoqatsiz deb e’lon qiluvchi 25-tuzatishni amalda qo‘llash uchun Vazirlar Mahkamasini chaqirish va safarbar qilish”ga chaqiradi, dedi u.

Pelosining so‘zlariga ko‘ra, agar hujjat bir ovozdan ma’qullanishiga erishilmasa, vakillar palatasi unga 12-yanvar kuni ovoz beradi, so‘ng esa impichment haqidagi masalani ko‘rib chiqishni boshlaydi. “Biz vitse-prezidentni 24 soat ichida javob berishga chaqiramiz”, — dedi spiker.

“Konstitutsiyamizni va demokratiyamizni himoya qilib, biz zudlik bilan harakat qilamiz, chunki amaldagi prezident ular uchun muqarrar xavf tug‘diradi”, — deya qo‘shib qo‘ydi Pelosi.

Avvalroq AQSh vitse-prezidenti Mayk Pens mamlakatning amaldagi prezidenti Donald Tramp “yanada beqarorlashgan” taqdirda, unga nisbatan Konstitutsiyaga kiritilgan 25-tuzatish qo‘llanilishi mumkinligini istisno qilmagan edi.

AQShdagi hukumat va xususiy tarmoqlarga nisbatan keng ko‘lamli xakerlar hujumi haqida dekabrda ma’lum bo‘ldi. AQSh Moliya vazirligi, Milliy telekommunikatsiya boshqarmasi va boshqalar hujum nishoniga aylangan. OAVlar APT29 guruhi xakerlari (COZY Bear sifatida ham mashhur) ortida Moskva turganini xabar qildi. Keyinroq hodisaga Rossiyaning aloqadorligi haqida AQSh bosh prokurori ham ma’lum qildi. Ammo Tramp bunga shubha bildirib, hujum ortida Xitoy turibdi, degan fikrni ilgari surdi. Shuningdek, uning aytishicha, OAVlar bu hujumni aslidan ko‘ra vahimaliroq qilib tavsiflagan.