АҚШ вакиллар палатаси спикери Нэнси Пелоси амалдаги президент Дональд Трампнинг Америка федерал муассасаларига уюштирилган ва Вашингтон фикрича, Москвага алоқадор бўлган оммавий хакерлар ҳужумига нисбатан ҳаракатсизлик кўрсатаётганини танқид қилди. Бу ҳақда «РБК» хабар бермоқда.
«Хакерлик ҳужумига келса, у бу ҳақда ҳеч нарса демади», — деди Пелоси CBS’га берган интервьюсида. Журналист бунга жавобан Трамп ҳужумга Хитой алоқадор бўлиши мумкинлиги ҳақида гапирганини эслатди.
Пелосининг тахмин қилишича, Америка президентининг бундай муносабати Россияда уни обрўсизлантирувчи материаллар борлигига боғлиқ бўлиши мумкин. «Русларда президент Трампга нисбатан нима борлигини билмайман — шахсий, сиёсий ёки молиявий маълумотми… Аммо у нима учун бу даражада Путинга хизматкорлик қилишини изоҳлайдиган бошқа нарса йўқ».
Пелосининг сўзларига кўра, ҳозир АҚШда ҳокимият тепасида «жиноий иш қўзғатиладиган даражада жиддий нарсага қўл урган» одам турибди. Унинг фикрича, Трамп ўз тарафдорларини қўзғалонга гижгижлаганликда айбдор. Шунингдек, вакиллар палатаси спикери Конституцияга киритилган 25-тузатишдан фойдаланиш ғояси ёқиб тушганини айтди. 25-тузатиш вице-президент ва президент маъмуриятининг катта қисми амалдаги давлат раҳбарининг лаёқатсизлигини тасдиқлаган тақдирда, ҳокимиятнинг автоматик равишда вице-президентга топширилишини кўзда тутади.
Нэнси Пелоси маълум қилишича, 11 январь куни Америка Конгрессининг вакиллар палатаси вице-президент Майк Пенсга қаратилган ҳокимиятдан амалдаги давлат раҳбари Дональд Трампни четлатишга чақирувчи резолюцияни кўриб чиқишни бошлайди.
Ҳужжат Пенсни «президентни ўз хизмат мажбуриятларини бажариш учун лаёқатсиз деб эълон қилувчи 25-тузатишни амалда қўллаш учун Вазирлар Маҳкамасини чақириш ва сафарбар қилиш»га чақиради, деди у.
Пелосининг сўзларига кўра, агар ҳужжат бир овоздан маъқулланишига эришилмаса, вакиллар палатаси унга 12 январь куни овоз беради, сўнг эса импичмент ҳақидаги масалани кўриб чиқишни бошлайди. «Биз вице-президентни 24 соат ичида жавоб беришга чақирамиз», — деди спикер.
«Конституциямизни ва демократиямизни ҳимоя қилиб, биз зудлик билан ҳаракат қиламиз, чунки амалдаги президент улар учун муқаррар хавф туғдиради», — дея қўшиб қўйди Пелоси.
Аввалроқ АҚШ вице-президенти Майк Пенс мамлакатнинг амалдаги президенти Дональд Трамп «янада беқарорлашган» тақдирда, унга нисбатан Конституцияга киритилган 25-тузатиш қўлланилиши мумкинлигини истисно қилмаган эди.
АҚШдаги ҳукумат ва хусусий тармоқларга нисбатан кенг кўламли хакерлар ҳужуми ҳақида декабрда маълум бўлди. АҚШ Молия вазирлиги, Миллий телекоммуникация бошқармаси ва бошқалар ҳужум нишонига айланган. ОАВлар АPT29 гуруҳи хакерлари (COZY Bear сифатида ҳам машҳур) ортида Москва турганини хабар қилди. Кейинроқ ҳодисага Россиянинг алоқадорлиги ҳақида АҚШ бош прокурори ҳам маълум қилди. Аммо Трамп бунга шубҳа билдириб, ҳужум ортида Хитой турибди, деган фикрни илгари сурди. Шунингдек, унинг айтишича, ОАВлар бу ҳужумни аслидан кўра ваҳималироқ қилиб тавсифлаган.
Мавзуга доир:
Изоҳ (0)