Грознийда Чеченистон раҳбари Рамзан Қодиров номини беришга қарор қилинган масжид қурилиши учун капсула қўйилди. Бу ҳақда 8 январь куни «Грозний» Чеченистон давлат телерадиокомпанияси маълум қилди, деб ёзмоқда Meduza.
Телеканал маълумотларига кўра, «республика аҳолисининг кўп сонли илтимосларига биноан» масжидга Рамзан Қодиров номини беришга қарор қилинди. Қодировнинг ўзи бундай ғояга «қатъий қарши» чиққан, аммо жамоатчилик, диний уламолар ва Чеченистон раҳбари сафдошлари ўз фикрида туриб олган.
11 январь куни Чеченистон матбуот вазири Аҳмед Дудаев «РИА Новости»га берган интервьюсида «бизда демократик жамият ҳукмрон, республика аҳолисининг иродаси ва хоҳиши бизда устувор аҳамиятга эга» деб айтган.
Масжид икки минг кишига мўлжалланган бўлади. Унинг қачон қурилишига аниқлик киритилмаган. Рамзан Қодировнинг вафот этган отаси Аҳмат Қодиров номи билан аталган энг йирик масжидлардан бири бўлган «Чеченистон юраги» қурилиши икки ярим йил давом этди.
«Грозний» телеканали маълумотларига кўра, Чеченистонда 1200 тадан ортиқ мажид бор. 2020 йилда республикада 32 та масжид қурилган, яна 70 га яқин масжидлар қурилиши давом этмоқда.
Изоҳ (0)