Шомуродовнинг отаси: Элдор «Женоа»нинг яхши ва ёмон кунини кўпроқ кўриши керак

Ўзбекистон терма жамоаси ва «Женоа» ҳужумчиси Элдор Шомуродовнинг отаси Азамат Шомуродов «Sports.uz» нашри билан суҳбатда ўғлига «Ювентус» қизиқаётгани ҳақидаги хабарларга муносабат билдирди.

«Элдорнинг мақсади катта. У Италиянинг ўртачароқ клубда ўйнаяпти, ўзини кўрсаца яна ҳам кучли клубга ўтишига ишончим комил. Ҳаммасини вақт кўрсатади. Ўзига ишонмаса, у ерларга бормасди. Ўзи ҳам катта ниятлар билан кетган, биздан дуо олиб. Насиб бўлса, ҳозирча ҳаммаси яхши кетяпти.

«Ювентус» оладими ёки бошқасими, ҳаммасини вақ кўрсатади. Лекин, менимча, «Женоа»да яна бироз тўп суриб мослашиши керак. «Ювентус»га ўтиб кетса, захирада ўтириб қолармикин, дейман-да. «Женоа»нинг яхши ва ёмон кунини кўпроқ кўриши керак. Мана ҳозир жароҳатдан қутулиб ўз устида яхши ишлаяпти. Уни ҳамма кўтар-кўтар қилиб, «Ювентус»га ўтишини олқишлашса-ю, лекин бироз ўйини чиқмай захирага ўтириб қолса, яна гап-сўз бўлади.

«Ростов»да ҳам Шомуродовни у ер, бу ерларга кетади дейишганида гол ура олмай қолганди. Бу нарса миясига ўрнашиб қолиши мумкин. Ўша пайтларда шундай бўлди, бир қатор клублар чақиряпти дейишди, бу томонда уйланиш режаси ҳам бор эди. Натижада 6-7 ой гол ура олмай қолганди. Аммо Элдор аввалгидан анча улғайди. Ўйини ҳам ўзгарди. Энди бундай гаплар таъсир қилмаса керак деб ўйлайман», — дейди Элдор Шомуродовнинг отаси.

Азамат Шомуродов ушбу хабарлар чиққач, Элдор билан ҳеч ким гаплашганини ва ҳозир у фақат ўйин ҳақида ўйлаётганини билдирди.

«Элдор билан бу ҳақида ҳеч ким гаплашмаган. Фақат шундай мақола чиқиб кетган. Балки ростдан эътибор қаратишаётгандир, бироқ клуб билан ҳам, ўзи билан ҳам гаплашишмаган. Элдор фақат ўйин ҳақида ўйлаяпти (Италия А Сериясининг 17-туридан ўрин олган «Женоа» — «Болонья» ўйини назарда тутилмоқда — «Дарё»), телефонини ҳам ўчириб қўйган».

Қайд этиш жоиз, аввалроқ Турин клубининг Шомуродовга қизиқиш билдиргани ва Элдорнинг Альваро Моратага ўринбосар сифатида кўрилаётгани ҳақида хабар берилганди.

«Женоа» Элдор Шомуродов трансферини 2020 йил 4 октябрида эълон қилган. Генуяликлар ҳужумчи учун «Ростов»га бонуслар билан бирга ҳисоблаганда 9 миллион евро тўлаши айтилганди.

Ўзбекистонлик форвард «Женоа» сафида ҳозирга қадар 11 та ўйинда қатнашиб, 2 та гол урди ва 2 та голли узатмани амалга оширди.