Italiyaning “Jenoa” klubi o‘zbekistonlik hujumchi Eldor Shomurodov transferini e’lon qildi.

Foto: Twitter/@GenoaCFC

Shomurodov genuyaliklar klubi bilan 2024-yilning 30-iyuniga qadar mo‘ljallangan shartnoma imzoladi.

Avvalroq “Jenoa” Shomurodov transferi uchun bonuslar bilan birga hisoblaganda 9 million yevro sarflashi, Eldorning yangi jamoasidagi maoshi yiliga 600-700 ming yevroni tashkil etishi xabar qilingandi.

Shomurodov yangi jamoasida A Seriya 4-turidan o‘rin olgan 19-oktabr kungi “Verona”ga qarshi o‘yindayoq debyut qilishi mumkin. “Jenoa” ayni damda 3 ochko bilan 13-o‘rinda bormoqda. Avvalroq, jamoaning bir necha futbolchisida koronavirus aniqlangani sabab genuyaliklarning A Seriya 3-turi doirasida “Torino”ga qarshi o‘yini qoldirilgandi.

Ma’lumot uchun, 25 yoshli futbolchi “Mash’al” akademiyasi tarbiyalanuvchisi hisoblanib, “Bunyodkor” va “Rostov” safida harakat qilgan. Eldor rostovliklar jamoasida 2017-yildan beri to‘p tepib kelardi. Mazkur vaqt mobaynida u 91 o‘yinda maydonga tushib, 18 ta gol urdi va 12 ta golli uzatma amalga oshirdi.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!