Тошкент шаҳри Мирзо Улуғбек туманида жойлашган Makro супермаркети ичига Lacetti кириб кетгани ҳақида хабар берилганди. Мазкур ҳолат юзасидан ЙҲХББ маълумот берди.
Маълум қилинишича, 2021 йилнинг 7 январь куни соат 13:50 ларда Тошкент шаҳар Мирзо Улуғбек тумани Гёте-5 кўчасида ҳайдовчи, 1983 йилда туғилган Ж.Ш. Lacetti русумли транспорт воситасида ҳаракатланиб келиб, ушбу кўчада жойлашган Makro супермаркети яқинига тўхтаган.
Ҳайдовчи ўт олдиргич калит ва фарзандини қаровсиз қолдириб, ўзи супермаркет ичига кириб кетган. Автомобильда бўлган 8 ёшли фарзанди ўт олдиргич калитни бураб юбориши оқибатида автомобиль ҳаракатланиб кетган ва супермаркет ойнасини синдириб, ичкарига кириб тўхтаган.
Ҳодиса натижасида тан жароҳати олганлар йўқ.
Мазкур ҳодиса юзасидан Тошкент шаҳар ИИББ ЙҲХБ томонидан суриштирув ишлари олиб борилмоқда.
Аввалроқ Тошкентда ЙПХ ходимини машинаси капотида судраб кетган ҳайдовчига чора кўрилгани ҳамда Қашқадарёда фуқароларни сўккани айтилаётган ЙПХ инспекторига ҳайфсан берилгани ҳақида хабар берилганди.
Изоҳ (0)