Kia компанияси ўзининг логотипи ва шиорини ўзгартирди

Kia компанияси расман логотипини ўзгартирди ва янги шиорини тақдим этди. Янги рамзни намойиш этиш учун Инчон шаҳри осмонига рекорд миқдорда «пиротехник дронлар» кўтарилган ва юзлаб мушаклар отилган. Мазкур ҳолат Гиннеснинг рекордлар китобидан жой олди, деб ёзади Motor.

Янги логотип ўзида «симметрия», «ритм» ва «кўтарилиш» элементларини мужассамлаштирган. У икки ўлчамли ва овалларсиз, компания номи эса 1994 йилдан бери фойдаланиб келинган эмблемадан фарқ қилувчи шрифтда ёзилган. Компаниядагиларнинг тушунтиришича, логотипнинг узлуксиз ритмик чизиғи «бренднинг мижозлар учун ҳар қандай муносабатда илҳом онини яратишга бўлган уринишига содиқлигини, симметрия эса ишонч рамзи» ҳисобланади. Кўтарилаётган чизиқлар эса «бренднинг ўсишга бўлган истакларини ва у мижозларга тақдим этаётган нарсаларини» ифодалайди.

Шиор ҳам ўзгарган: «Санъат ҳайратга солади» (The Power to Surprise) ўрнини «Ҳайратлантирувчи ҳаракат» (Movement that Inspires) эгаллаган.

Kia 303 та дронни учириб Гиннеснинг рекордлар китобидан жой олган — бу ҳозирги кунда мушакбозлик учун мўлжалланган учувчисиз бошқариладиган учиш аппаратларининг бир вақтда осмонга кўтарилган рекорд миқдордаги сони ҳисобланади.

Эслатиб ўтамиз, 2020 йилнинг мартида Германиянинг BMW автоконцерни ўзининг икки ўлчамли янги логотипини тақдим этганди.