Бухорода божаларининг вафотига сабабчи бўлган фуқаро 5 йилга қамалди

Бухорода ўзга шахс номидаги «Москвич»ни маст ҳолда бошқариб, унинг ариққа ағдарилиб кетишига ҳамда икки нафар божасининг вафотига сабабчи бўлган фуқаро У.Б. 5 йилга озодликдан маҳрум қилинди. Бу ҳақда «Дарё»га Жиноят ишлари бўйича Ғиждувон тумани суди судьяси Бобораҳим Очилов маълум қилди.

Аниқланишича, 2020 йилнинг 9 август куни Ғиждувон туманидаги «Соҳибиён» маҳалласида яшовчи фуқаролар — Умид, Ғофур, Шавкат ҳамда Қодир таниши Алишернинг (барча исм-фамилиялар ўзгартирилган) хонадонида тўпланган. Ушбу хонадонда овқатланиб, спиртли ичимликлар истеъмол қилган ҳолда тарқалган.

Орадан бир кун ўтгач, яъни 10 август куни Умид ишончнома орқали ўз бошқарувида бўлган «Москвич»да божаси Ғофур билан Ғиждувон туман марказига бориб келган. Ғофур туман марказидан қайтишда бир дона ароқ ва бир кило гўшт олган. Улар биргаликда божаси Шавкат хонадонига бориб, кечаги куннинг давоми сифатида ёзилган дастурхон атрофида яна тўплана бошлаган. Беш нафар божа ҳаддан ортиқ спиртли ичимлик истеъмол қилган.

Шундан сўнг божалар «Москвич»да ариқда чўмилиш учун йўлга чиққан. Йўл-йўлакай савдо дўконидан пиво ҳам харид қилган. Улар ариқ бўйида ўтириб, пиво ичган ва бир соатга яқин вақт мобайнида чўмилган. Шундан сўнг, тахминан, соат 14:30 да божалар Умид бошқарувчидаги «Москвич»да уйига қайтган. Маст ҳайдовчи йўлда машина бошқарувини йўқотиб, ариққа ағдарилган.

«Аввалига машинам қандай ағдарилганини тушунмай қолдим. Ҳатто, сув машинани 10—15 метр нарига оқизиб кета бошлади. Мен эса нима бўлаётганини англолмадим. Сув оқими машинамни канал четига суриб қўйган экан. Кейин бирдан сергак тортдим, машина эшиги ойнасини уриб, синдириб чиқдим. Нафасимни ростламай, машина ичидан божаларимни тортиб ола бошладим. Шу орада бегона фуқаролар ёрдамга шошилишди», — дея воқеани эслайди судланувчи.

Судда таъкидланишича, судланувчининг икки нафар божаси воқеа жойида вафот этган.

Суд маст ҳолда машина бошқарган ва икки нафар фуқаронинг ўлимига сабабчи бўлган Умидни Жиноят кодекси 266-моддаси 3-қисмининг «а» банди (транспорт воситалари ҳаракати ёки улардан фойдаланиш хавфсизлиги қоидаларини бузиш) билан айбдор деб топиб, 5 йил муддатга озодликдан маҳрум қилган.