Футболда ҳар бир ўйинчининг трансфер қиймати тез-тез ўзгариб туради. Бунга турли кўрсаткичлар таъсир қилади: футболчининг муваффақияти, унинг майдондаги фойдалилиги, жароҳатланиш даражаси ва ҳоказолар. Одатда кўпчилик Лионель Месси, Криштиану Роналду, Килиан Мбаппе ва бошқа юлдуз футболчиларнинг трансфер қийматидаги ўзгаришларни кузатиб боради. Бироқ ҳозир нисбатан камроқ эътибор қаратиладиган ижрочилар ҳақида сўз боради, бунга сабаб уларнинг кучли бешлик чемпионатларда қатнашмаслигидир. Қуйида айнан топ-5 лигаларда ўйнамайдиган энг қиммат футболчилари ҳақида фикр юритилади.
Никола Влашич (25 миллион евро)Клуб: ЦСКАЛига: РПЛ
Влашич Россия чемпионатининг энг яхши легионерларидан бири ҳисобланади. Хорватияликни ўтган ёзда Италия клублари билан боғлашганди. Аммо футболчининг ўзи ЦСКАда яна камида 1 мавсум қолишга қарор қилди. 2020/21 йилги мавсумда 23 ёшли ярим ҳимоячи барча турнирларда 20 та ўйин ўтказиб, 7 та гол ва 5 та голли узатмага муаллифлик қилди. Эҳтимол, Влашич мавсумлар оралиғида ЦСКАни тарк этиши мумкин. Боиси жамоа Еврокубокларда муносиб иштирок эта олмади ва вақти-вақти билан ички чемпионат баҳсларида ҳам очко йўқотмоқда. Илгари унга «Наполи» асосий даъвогар ҳисобланарди. Ким билсин, балки ёзга бориб, Влашични ўз сафида кўришни истайдиганлар сони кўпайиб қолар.
Дониэлл Мален (25 миллион евро)Клуб: ПСВЛига: Нидерландия Эредивизияси
Нидерландия чемпионатидан ҳар доим кўплаб яхши футболчиларни топиш мумкин. Худди ана шундай ўйинчилардан бири Малендир. 21 ёшда бўлишига қарамай, у ПСВ етакчиси ҳисобланади. 2020/21 йилги биринчиликда ёш ҳужумчи барча мусобақаларда 18 та ўйинда майдонга тушиб, 12 та гол урди ва 3 та голга ассистентлик қилди. ПСВнинг мамлакат биринчилиги турнир жадвалида 3-ўринда бораётганида Дониэллнинг хизматлари катта. Топ чемпионатлардаги клублар орасида эса Маленга «Милан» томонидан катта қизиқиш билдирилмоқда. «Россонери»лар нидерландиялик ёш футболчини ҳар бир учрашувда 90 дақиқа ўйнай олмайдиган Златан Ибрагимовичга ўринбосар сифатида кўрмоқда. Аммо ҳозирча италияликларни ПСВнинг футболчига қўйилган юқори талаблари тўхтатиб турибди.
Габриэль Верон (25 миллион евро)Клуб: «Палмейрас»Лига: Бразилия А Серияси
Бразилия – Европа клублари учун истеъдодлар макони бўлиб келган. Айни вақтда улар «Палмейрас»нинг 18 ёшли вингери Веронни нишонга олган. Футболчига «Ювентус», «Арсенал», «Манчестер Сити», «Милан», «Шахтёр Д» ва «Реал» клублари қизиқиш билдирмоқда. Жорий мавсумда бразилиялик барча мусобақалар доирасида 26 та учрашув ўтказиб, 8 та гол ва 3 та голли узатмани амалга оширди. Ҳа, футболчининг самарадорлик кўрсаткичи жуда ҳам юқори эмас, лекин унинг бор-йўғи 2020 йилдан бери асосий жамоада ўйнаётганини унутмаслик керак. Шунга қарамай, ёш бразилиялик аллақачон яшил қитъа гигантлари эътиборини торта олган. Афтидан, унинг океанни сузиб ўтишига унчалик кўп вақт қолмаган.
Николас Тальяфико (28 миллион евро)Клуб: «АяксЛига: Нидерландия Эредивизияси
Тальяфико ушбу рейтингнинг энг «кекса» футболчиси саналади. Аргентиналик футболчи 28 ёшда. Охирги мавсумда «Аякс» ҳимоячиси бир нечта клублар, хусусан, инглиз жамоалари томонидан катта қизиқишларга сабаб бўлди. Футболчини «Манчестер Сити» ўз сафида кўришни хоҳлади. Футболчининг ўзи ҳам Премьер Лигада ўйнаш истагини очиқчасига билдирди. Аммо Тальяфикога Нидерландияни тарк этиш насиб этмади. Бунинг устига аргентиналик футболчи бироз муддат олдин «Аякс» билан шартномасини 2023 йилнинг июнигача узайтирди. Бу ҳимоячининг топ клубларда ўйнаш истагига чек қўйганини англатмаса-да, эндиликда вақт унинг фойдасига ишламаслиги аниқ.
Алехандро Грималдо (28 миллион евро)Клуб: «Бенфика»Лига: Примeйра
Ёшлигида «Валенсия» ва «Барселона» академияларида таҳсил олганига қарамай, Грималдо «Бенфика»да қўним топади ва ўша ерда профессионал даражада ўйнай бошлайди. 2017/18 йилги мавсумдан бошлаб у «Бенфика»нинг асосий ҳимоячиларидан бири бўлиб келган ва ҳозиргача яхши ҳаракат қилмоқда. 25 ёшли футболчига топ чемпионатлардан қизиқишлар борлиги ҳақида ҳеч қандай хабарлар йўқ. 2019 йилнинг ёзида «Зенит» испаниялик футболчи билан шартнома имзоламоқчи бўлди, аммо у «Бенфика» билан ҳамкорликни узайтиришга қарор қилди. «Барселона» битирувчиси учун РПЛга ўтиш олдинга ташланган қадам бўлиш эҳтимоли ҳақиқатдан йироқ эди. Эҳтимол, футболчининг ўзи ҳам худди шундай ўйлаган ва «бургутлар» сафида қолишга қарор қилган.
Хесус Корона (28 миллион евро)Клуб: «Порту»Лига: Примeйра
Корона 5 йилдан бери «Порту»да ўйнайди ва клуб етакчиларидан бири ҳисобланади. Мексикалик ўтган мавсумда Португалия чемпионатининг энг яхши футболчиси деб топилганди. 27 ёшли вингер жамоага ўз узатмалари билан чемпионат ва мамлакат Кубогини ютишига ёрдам берган. Жорий мавсумда Корона барча турнирларда 15 та ўйин ўтказиб, 2 та гол ва 6 та голли узатмани амалга оширди. Вақти-вақти билан футболчига топ чемпионатлардан ҳам қизиқишлар бўлиб туради. Мисол тариқасида, ўтган ёзда «Севилья» футболчини сотиб олмоқчи бўлди, аммо якунда трансфер амалга ошмади. Мексикалик Португалиядан кетишни истамади.
Малком (30 миллион евро)Клуб: «Зенит»Лига: РПЛ
2019 йилнинг ёзида «Зенит» Малкомни «Барселона»дан 40 миллион евро эвазига сотиб олганди. Ўшандан бери 23 ёшли бразилияликнинг трансфер қийматида 10 миллион йўқотилди. Футболчи кўпинча жароҳатларга мойиллиги ва паст самарадорлик учун танқид қилинади. Масалан, ушбу мавсумда Малком барча турнирларда 17 та ўйин ўтказиб, атиги 1 та гол ва 2 та голли узатмани амалга оширди. Албатта, бу қанот ҳужумчиси учун юқори натижа ҳисобланмайди. Шунга қарамай, «Зенит» устози Сергей Семак легионерга ишонишда давом этмоқда.
Андре Онана (36 миллион евро)Клуб: «Аякс»Лига: Нидерландия Эредивизияси
«Барселона» битирувчиси сифатида асосий таркибда ўзини кўрсата олиш имкониятига эга бўлмаган Онана 2015 йилнинг қишида «Аякс»га кўчиб ўтди ва у ерда 2016/17 йилги мавсумдан буён асосий дарвозабон сифатида фаолият юритмоқда. 2019/20 йилги компания давомида футболчи нидерланд клубини тарк этиш истагини очиқчасига билдирди. Ўша пайтда у Кепага ўринбосар излаётган «Челси»ни жиддий қизиқтириб қўйганди. Аммо «кўклар» якунда «Ренн» дарвозабони Эдуард Менди фойдасига танлов қилди ва камерунлик Нидерландияда қолишга мажбур бўлди. Сўнгги пайтларда 24 ёшли дарвозабонга топ чемпионатлардан қизиқишлар тўхтади. Аммо бу Онанада бошқа имконият бўлмайди дегани эмас. Футболчининг позицияси ва ёшини ҳисобга олган ҳолда, у ўзини кўрсатиш учун етарлича вақтга эга.
Давид Нерес (36 миллион евро)Клуб: «Аякс»Лига: Нидерландия Эредивизияси
Трансфер бозорида катта қийматга эга бўлган «Аякс»нинг яна бир вакили Давид Нересдир. Нерес ўтган мавсумнинг кўп қисмини жароҳати туфайли ўтказиб юборган. Ўшанда «Ливерпуль» унинг хизматларига жиддий қизиқиш билдирганди. Аммо 23 ёшли бразилиялик ўзини дастлаб «Аякс»да намоён этишга қарор қилди. Айни вақтда вингер жуда кўп ўйин амалиётига эга бўлмаяпти, бироқ мураббий футболчига ишонади. 2017 йилнинг қишида «Аякс»га ўтганидан бери Давид Амстердам клуби сафида 131 ўйин ўтказиб, 37 та гол ва 35 та голли узатмага муаллифлик қилди. Умуман, футболчида Нидерландия чемпионатида узоқ қолмаслик учун етарлича сабаблар мавжуд.
Изоҳ (0)