Барча учун оғир ва синовли ўтган 2020 йил ҳам охирлаб бормоқда. Мазкур йилда коронавирус пандемияси сабаб кўплаб йирик спорт мусобақалари қолдирилди. Хусусан, Токио—2020 Олимпиадаси ва Евро–2020 каби муҳим аҳамият касб этувчи турнирлар бир йил муддатга кечиктирилди. Бошқаларини эса бироз ноодатий форматда ўтказишга тўғри келди. Шунингдек, ортда қолаётган йил спорт олами учун катта йўқотишлари билан ҳам ёдда қолди. Диего Марадона, Коби Брайант, Паоло Росси ва Абдулманап Нурмагомедов каби буюк спорт дарғалари бу фоний дунё билан видолашди. Шунга қарамай, 2020 йил эслашга арзийдиган воқеаларга бой бўлди деб айтиш мумкин.
«Дарё» қуйида сизни 2020 йилда Жаҳон футболида содир бўлган энг эътиборга молик воқеаларни эслашга таклиф этади.
«Карантинли футбол»
Спорт турлари орасида футбол пандемия ҳолатидан биринчилардан бўлиб чиқди. Ўйинлар мухлисларсиз ва карантин қоидаларига амал қилинган ҳолда ўтказилди. Бунда футболчиларга майдонга тупуриш, ўзаро либос алмашиш ва гол урилганидан сўнг бир-бирини қучоқлаб (кейинчалик бекор қилди) табриклаш тақиқланди. Кулгили-а, шундайми? Бироқ пандемия шунга мажбур қилди, начора. Шунингдек, карантин сабаб юзага келган тақвимдаги тиғизлик туфайли футболчиларни авайлаш учун замонавий футболда илк бор бир ўйин давомида бештагача футболчи алмаштиришга рухсат берилди. Хурсанд қиладиган жиҳат, йил якунига бориб, кўплаб мамлакатларда мухлислар ташрифига рухсат берилди, бу эса футбол ишқибозлари билан биргаликда ўйинчиларни ҳам бирдек хушнуд этди. Ахир, футбол мухлислар учун ўйналади-ку...
«Такрорланмас» Чемпионлар Лигаси
Шубҳасиз, пандемия туфайли ортда қолган Чемпионлар Лигаси мавсуми ҳам ўзига хос ва ноёб тарзда ўтди. Барча миллий чемпионатлар амал-тақал қилиб тугатилгач, кун тартибидаги асосий масала Еврокубоклар бўлиб қолди. Шунда УЕФА барча жамоаларни Лиссабонга (Португалия) йиғишга ва мусобақани марказлашган ҳолда якунлашга қарор қилди. Ушбу ҳолатда плей-офф ўйинлари битта баҳсдан иборат бўлди. Бу қарорга келиш ташкилот учун қанчалик оғир бўлмасин, вазият шуни тақозо этарди. Чунки чор-атрофда кўринмас бало изғиб юрарди.
Хўш, COVID-19 Чемпионлар Лигаси финалига таъсир қилдими? Бунинг учун 2018/19 йилги «Ливерпуль» ва «Тоттенҳэм» ўртасидаги учрашувни эслашнинг ўзи кифоя. Ўшанда ҳатто гавжум стадион ҳам ўйинни «қиздириб» бера олмаганди. Бу йили трибуналар бўш, биринчи бўлим голсиз ўтган бўлса ҳам, олдинги йилги Чемпионлар Лигаси финалига қараганда кўпроқ воқеаларга бой бўлди дейиш мумкин, бу ерда мотивация ўз сўзини айтди. Бу билан ўтган йилги финалда мотивация йўқ эди деган фикр илгари сурилмаяпти. Шунчаки Неймар барчага Мессисиз ҳам кучли эканлигини исботлашни, Мбаппе 21 ёшида ҳам терма жамоа (Мбаппе 2018 йилда Франция терма жамоаси билан Жаҳон чемпиони бўлган), ҳам клуб миқёсидаги энг катта иккита йирик мусобақада ғолиб бўлишни истарди. Левандовски бошчилигидаги «Бавария» эса ўзининг Европадаги тенгсиз эканлигини кўрсатмоқчи эди.
Якунда «футболни 22 киши ўйнайди, якунда эса немислар ғалаба қозонади» деган ибора ўз исботини топди, «Бавария» тизимли футболнинг натижасини кўрсатди. Жамоа карантиндан олдин ҳам ғалаба қозонаётганди, ундан кейин ҳам тўхтамади. Афтидан, унга ҳеч нарса таъсир қилмайдигандек, на коронавирус ва карантин. Нима бўлса ҳам ғалаба қозонаверади.
Ушбу Чемпионлар Лигасини эслаб қолинг. Тўғри, унинг ғолиби ҳеч кимни ажаблантирмади, аммо жамоаларнинг финалгача бўлган йўли мислсиз ҳодиса эди. Бунақаси энди бошқа бўлмайди (бўлишини ҳеч ким хоҳламаса ҳам керак).
«Ливерпуль»нинг 30 йиллик орзуси
Англиянинг энг тарихий клубларидан бири «Ливерпуль» сўнгги йилларда ўз номини қайта тиклашга муваффақ бўлди. Жамоада Виржил ван Дейк, Allison, Муҳаммад Салоҳ ва Садио Мане каби юлдузлар пайдо бўлди. Юрген Клопп жамоаси 2018/19 йилги мавсумда Чемпионлар Лигаси бош совринига эга чиққан эди, 2020 йилда эса нақ 30 йиллик танаффусдан кейин Англия Премьер Лигасида зафар қучди. Бунинг учун Мерсисайд клуби узоқ ва оғир йўлни босиб ўтди.
«Ливерпуль» ўтган мавсумда Премьер Лигадаги аксарият рекордларнинг ҳам муаллифи бўлди. Мисол учун, «қизиллар» турнирда 31 та ўйинда ғалаба қозониб, бир мавсумда бундай кўрсаткичга эришган ягона жамоага айланди. Бундан ташқари, мерсисайдликлар лига тарихидаги энг эрта чемпионликни қайд этди. «Қизиллар» чемпионат якунланишига 7 тур қолганида ўзлари учун чемпионликни кафолатлаб қўйганди. Умуман олганда, «Ливерпуль»нинг такрорлаган, янгилаган ва ўрнатган рекордлари ҳақида соатлаб тўхтамасдан гапириш мумкин. Асосийси, «қизиллар» 30 йиллик танаффусдан кейин муносиб тарзда чемпионликни қўлга кирита олди. Муҳими шу.
Мессининг аразлаши
2020 йилнинг энг асосий воқеаларидан яна бири, фаолияти давомида фақат «Барселона» сафида тўп сурган Мессининг каталон клубини тарк этишга қарор қилгани бўлди. Уни клубнинг сўнгги йиллардаги натижалари, мақсадлари ва раҳбарияти қониқтирмади. Шунингдек, унинг бирин-кетин дўстлари ҳам клубдан бадарға қилина бошлади. Месси шу сабаблар туфайли клуб раҳбариятига кетиши тўғрисида бюрофакс юборди. Бироқ собиқ президент Хосеп Бартомеу бунга йўл қўймади ва пандемия шароитида унинг товон пулини 700 миллион евро этиб белгилади. Якунда Месси жамоада қолишга мажбур бўлди.
«Доимо «Барселона» менинг ҳаётим эканини айтиб келганман. 13 ёшимдан шу ерда яшайман. Мен ҳам клуб, ҳам шаҳарда катта бўлдим. Ватаним Аргентинага қараганда, Барселонада узоқроқ яшаганман. Бу ерда ҳамма нарсани ўргандим, клуб мени футболчи ва инсон сифатида тарбиялади. «Барса» менга ҳамма нарсани берди, мен ҳам доимо «Барселона» учун боримни берганман.
Агар ўтган ёзда бепул кетмоқчи бўлганимда, судга мурожаат қилиб, ишни ютиб чиқардим. Бу ҳақида менга кўплаб адвокатлар айтди. Бироқ шунчаки бу тарзда кетишни хоҳламадим», — дейди Месси жамоадан кетмоқчи бўлгани ҳақида.
Умуман олганда, футбол олами 2020 йилда жуда кўплаб воқеаларга бой бўлди. Афсуски, уларнинг барчасини санаб ўтишнинг имкони йўқ. Шунинг учун айбга буюрмайсиз деган умиддамиз. Кириб келаётган 2021 йилда сизга тинчлик-осойишталик, сиҳат-саломатлик ва оилавий бахт доимий ҳамроҳ бўлсин!
Билол ЭРКИН тайёрлади
Изоҳ (0)