Оғир йилнинг олғирлари: 2020 йилнинг энг яхши трансферлари ҳақида

Декабрь ойининг сўнгги куни ҳам ўтиб бормоқда, шундай экан 2020 йилнинг якунларини сарҳисоб қилишнинг айни вақти. Ортда қолаётган йил кўпчилик учун ҳар томонлама оғир кечгани бор гап, аммо бу сўзларнинг ҳозир фикр юритиладиган футболчиларга умуман дахли йўқ. Боиси улар айнан мазкур йилда ижобий натижаларга эришди.

«Дарё» қуйида ўқувчиларга 2020 йилнинг энг яхши трансферларини ҳавола этади.

Луис Суарес: «Барселона»дан «Атлетико»га

Рўйхатни «Барселона» афсонаси Луис Суарес очиб беради.  Узоқ йиллар давомида каталон клуби шарафини ҳимоя қилган ва у билан кўплаб совринларни қўлга киритган Суаресдан шунчаки воз кечилди. Унинг шунча йиллик  меҳнатлари қадрланмади ҳам. Бироқ истеъдод хор бўлмайди деганларидек, у дарров ўзига янги жамоа топди – Мадриднинг «Атлетико» клуби уни қучоқ очиб кутиб олди. 33 ёшли уругвайлик ҳужумчи янги жамоасида шу қадар ажойиб ва фойдали ҳаракат қилмоқдаки, гўё у ўзининг иккинчи ёшлигини ўтказаётгандек таассурот уйғонмоқда. Айни дамда Суарес 7 та гол билан Испания Ла Лигасининг энг яхши тўпурарларидан бири бўлиб турибди.

«Сити» 27 миллион евро эвазига 20 ёшли испаниялик футболчини «Бавария»га кетган Лерой Саненинг ўрнини тўлдириш учун харид қилди. Торрес «шаҳарликлар» билан беш йиллик шартнома имзолади. Ҳозирча бу трансфер ўзини тўлалигича оқламоқда. «Ман Сити»га ўтиш ва Гвардиола қўл остида тўп суриш вингер учун трамплин вазифасини ўтамоқда. Торрес аллақачон «шаҳарликлар» сафида 7 та гол уришга ва ҳатто Испания терма жамоасида дебют қилиш баробарида ҳет-трикни амалга оширишга улгурди. Ҳозирда унинг трансфер қиймати 50 миллион еврога баҳоланмоқда.

Ашраф Ҳакими: «Реал»дан «Интер»га

«Реал» тарбияланувчиси ўз клубида қадр топмади ва сўнгги икки мавсумни ижара асосида «Боруссия Дортмунд»да ўтказди. Айнан ўша ерда у футболчи сифатида очилди ва бошқа клублар эътиборини ўзига қаратишга муваффақ бўлди. Немис клуби уни сотиб олмасликка қарор қилгач, «Интер» Ҳакимини ўз сафига қўшиб олди ва йилига 5 миллион евро маошли беш йиллик шартнома имзолади. Марокашлик А Серияга жуда тез мослашди ва Антонио Конте бошчилигидаги «Интер»нинг асосий ўйинчисига айланди. Самарадорлик борасида ҳам унга исталган ҳимоячи фақат ҳавас қилиши мумкин – 14 та ўйин, 4 та гол ва 3 та ассист.

Эдинсон Кавани: ПСЖдан «Манчестер Юнайтед»га

ПСЖ тарихидаги энг яхши ҳужумчилардан (200 та гол ва 6 та соврин) бири 2019/20 йилги мавсум якунларига кўра жамоани тарк этадиган бўлди. Уругвайлик ҳужумчининг Париж клуби билан шартномаси ниҳоясига етди, ПСЖ эса келишувни узайтирмасликка ҳаракат қилди. Шу тариқа таниқли ҳужумчининг фаолиятини қаерда давом эттириши сўроқ остида қолди. Асосан, уни MLS билан боғлашди. Аммо Кавани трансфер ойнасининг сўнгги кунида «Манчестер Юнайтед» билан келишувга эришди. Инглиз клуби Эдинсон билан 1+1 кўринишидаги шартнома имзолади. Кавани Премьер Лигада ҳам «йўқолиб» қолгани йўқ, гарчи асосий таркибдан муқим ўрин ололмаган бўлса-да, у ўз имкониятларидан аъло даражада фойдаланмоқда ва уни ҳисобдан чиқарганларга ўзининг нималарга қодирлигини яна бир марта исботлаб қўйди.

Эдуард Менди: «Ренн»дан «Челси»га

Кепанинг «қовун»ларидан тоқати тоқ бўлган «Челси» ниҳоят кузда ўзига янги дарвозабон харид қилди. «Аристократлар» мухлислари Мендини аллақачон «янги Чех» деб аташни бошлаб юборган. Лондон клуби «Ренн» дарвозабони учун 24 миллион евро сарфлади. Менди Фрэнк Лэмпард қўл остида ўтказган 16 ўйиннинг 10 тасида дарвозаси дахлсизлигини сақлаб қолди.

Жотанинг трансфери учун «Ливерпуль» нақ 45 миллион евро тўлади. Бу Салоҳ ёки Манега сарфланган маблағдан кўпроқ эди. Аммо Жота ўз ўйини билан потенциал жиҳатидан на сенегаллик ва на мисрликдан қолишмаслигини исботламоқда. У Клоппнинг ўйин схемасига жуда мос келади ва бир вақтнинг ўзида бир нечта позицияларни ёпиши мумкин. «Ливерпуль» сафида 17 учрашувдан сўнг португалиялик футболчининг ҳисобида 9 та гол, жумладан, Чемпионлар Лигасидаги ҳет-трик бор.

Моратанинг «Ювентус»га қайтиши ҳам ўтган йилги  трансфер бозорининг асосий воқеаларидан бири бўлди. Испаниялик Роналду билан биргаликда ажойиб тандем ярата олди. Мората «кекса синьора» сафида 17 учрашувда майдонга тушиб, 10 та гол ва 5 та голли узатмани амалга оширди. Шубҳа йўқки, «Юве» аллақачон футболчининг тўлиқ трансферини қўлга киритиш борасида иш олиб бормоқда.

Златан Ибрагимович: «Лос-Анжелес Гэлакси»дан «Милан»га

Ёш шунчаки оддий рақам эканлигини исботлаб келаётган Златан 39 ёшида ҳам Европани қайтадан забт этмоқда. Йил бошида дастлаб «Милан» билан ярим йиллик (кейин томонлар келишувни яна бир йилга узайтирди) шартнома имзолаган швед бугунги кунга келиб, жамоанинг том маънодаги юраги ҳисобланади. Айнан у келганидан кейин жамоа ўзининг аввалги мавқейини тиклай бошлади. Унинг самарадорлигига эса гап-сўз бўлиши мумкин эмас.

Бир қанча муваффақиятсиз трансферлардан кейин ниҳоят «Юнайтед» ажойиб танловни амалга оширди. Брунунинг трансфери клуб учун 55 миллион еврога тушганди, аммо португалиялик ўз ўйини билан бу пуллардан-да кўпроғига арзишини исботлади. Фернандеш «қизил иблис»ларнинг ҳақиқий етакчисига айланди, клуб мухлислари эса уни аллақачон Роналду билан таққослашни бошлаб юборди. Бруну нафақат жамоа ўйинини назорат қилади, балки деярли ҳеч бир баҳсни голсиз тарк этмайди.

Эрлинг Ҳоланд: «Зальцбург»дан «Боруссия Д»га

Дортмунднинг «Боруссия»си йилнинг энг яхши трансферига қўл урди деб бемалол айтиш мумкин. «Арилар» норвегиялик катта истеъдод эгаси учун атиги 20 миллион сарфлаганди. Ҳозир эса Ҳоланд дунёнинг энг қиммат футболчилари қаторида тилга олинади. Айтиш жоизки, Эрлинг футбол оламида 2020 йилда коронавирусдан-да кўпроқ шов-шув кўтара олди.

2020 йилги Golden Boy соврини соҳиби учун бугунги кунда Европанинг энг номдор жамоалари кураш олиб бормоқда, жараённи эса коронавирус оқибатида келиб чиққан инқироз секинлаштириб турибди. Футбол мухлислари 2021 йилнинг ёзига келиб, Ҳоландни бирор топ-клуб сафида кўришса ажаб эмас. Унинг статистикаси ҳақида эса яхшиси гапирмаган маъқул.