Буюк Британия ҳукумати Британия-Швеция компанияси AstraZeneca ва Оксфорд университети томонидан биргаликда ишлаб чиқарилган вакцинадан фойдаланишни маъқуллади. Бу ҳақда Meduza хабар бермоқда.
Фото: AP Photo
«Клиник текширувлар ва тажрибаларнинг батафсил таҳлилидан сўнг Дори воситалари ва тиббий буюмлар сифатини назорат қилиш бошқармаси вакцина хавфсизлик, сифат ва самарадорликнинг стандарт меъёрларига жавоб беради деган хулосага келди», — деб хабар берган Буюк Британия Соғлиқни сақлаш вазирлиги.
Қайд этилишича, вакцина билан эмлаш 4 январдан бошланади. Британия 100 миллион доза вакцинага буюртма берган — бу 50 миллион кишини эмлаш учун етади.
Буюк Британия AstraZeneca вакцинасини рўйхатдан ўтказган дунёдаги биринчи давлат бўлди. Аввалроқ у АҚШнинг Pfizer ва Германиянинг BioNTech компанияси томонидан ишлаб чиқилган вакциналарни биринчилардан бўлиб лицензиялаганди.
Британия ҳукумати AstraZeneca ва Оксфорд университети вакцинасини лицензиялаш учун асос бўлган тадқиқот натижаларини эълон қилмади. Бу уни Pfizer/BioNTech ва АҚШда тасдиқланган Moderna вакцинасидан ажратиб туради.
Ноябрь ойининг охирида AstraZeneca компанияси Оксфорд университети билан ҳамкорликда ишлаб чиқарган вакцинаси 70 фоиз самарадорлиги ҳақида эълон қилганди. Компания вакцина турли эмлаш схемаларида турлича самарадорлик кўрсатганини билдирган.
Хусусан, одамлар вакцинанинг дастлаб яримта дозасини олиб, бир ойдан сўнг тўлиқ дозаси билан эмланганда 90 фоиз самарадорлик кўрсатган. Шу билан бирга, камида бир ойлик фарқ билан тўлиқ дозаларда эмланган иштирокчиларда 62 фоиз самарадорлик кўрсатган. Вакцинанинг иккала схемаси бўйича умумий самарадорлиги 70 фоизни ташкил этган.
Буюк Британияда аҳолини COVID-19’га қарши эмлаш 8 декабрдан бошланди.
