Навальнийга қарши янги жиноят иши қўзғатилди. У хайрия сифатида йиғилган 356 млн рублни ўғирлашда гумонланмоқда

Россия Тергов қўмитаси (ТҚ) Алексей Навальнийга қарши янги жиноят иши қўзғатилгани ҳақида хабар берди, деб ёзади Meduza.

Тергов версиясига кўра, Навальний, ККФ (Коррупцияга қарши кураш фонди) ва бошқа нотижорат фондларнинг «ҳақиқий раҳбари сифатида», «бошқа шахслар билан ҳамкорликда» хайрия сифатида йиғилган ва фақат фонд мақсадлари учун мўлжалланган 588 миллион рублнинг 356 миллионини шахсий мақсадлари йўлида сарфлаган. ТҚ қайд этишича, Навальний бу пулга кўчмас мулк ва моддий қийматликлар сотиб олган, шунингдек, харажатлар учун, шу жумладан, чет элдаги ҳордиқ учун ишлатган. «Шу тариқа, фуқаролардан йиғилган маблағлар ўғирланган», дейилади идора пресс-релизида. Жиноят иши уюшган гуруҳ томонидан ўта йирик миқдорда содир этилган фирибгарлик ҳақидаги модда бўйича қўзғатилган, у 10 йилгача озодликдан маҳрум этишни кўзда тутади.

Навальний янги ишни ўзининг заҳарланиши бўйича текширув билан боғлади. «Мен роликда ўша пайт айтган эдим, улар мени ўша самолётда ўлмаганим ва кейин ўз қотилларимни қидирганим учун қамоққа тиқишга уриниб кўради деб. Ҳамма нарсанинг ортида шахсан Путин турганини исботлаганим учун», — деб ёзди сиёсатчи Instagram’да. У «уни ўлдиришга урингунларича ҳам жим турмаганини, энди эса ундан ҳам баттар бўлиши»ни қўшиб қўйди. Навальнийнинг ҳудудий штаблари тармоғи раҳбари Леонид Волков, ўз навбатида, ККФ ва штаблар хайриячилар қаршисида ҳам, Россия Адлия вазирлиги қаршисида ҳам очиқчасига йилда бир марта барча хайриялар ҳақида ҳисобот беришини эслатди. «Мамлакатимиздаги энг катта краудфандинг кампаниясини ‘фирибгарлик’ деб эълон қилиш — КФФнинг бутун Россия бўйича юз минглаб тарафдорлари юзига тупуриш демакдир», — деб ёзди Волков Telegram’да.

Жазоларни ижро этиш федерал хизмати бир кун аввал Навальнийга шартли муддатни ҳақиқийсига алмаштириш билан таҳдид қилган эди — «Ив Роше» иши бўйича. Идора Германияда бўлиб турган Навальний шартли ҳукм мажбуриятларини бажармаётгани (у 30 декабргача синов муддатида турибди) ва жиноий-ижро инспекцияси назоратидан бўйин товлаётганини маълум қилди. The Lancet журналидаги, сиёсатчининг «Новичок» гуруҳидаги заҳар билан заҳарлангани ҳақидаги мақолага таяниб, Жазоларни ижро этиш федерал хизмати 12 октябргача Навальнийда «касалликнинг барча оқибатлари ўтиб кетгани»ни айтди ва 29 декабрь куни эрталаб соат 9 да идоранинг Москвадаги филиалига етиб келишни талаб қилди, акс ҳолда синов муддати шартлари бузилгани учун ҳақиқий муддат тайинлаш ҳақидаги ариза билан судга мурожаат қилишга ваъда берди. 29 декабрь куни эса Жазоларни ижро этиш федерал хизмати судга мурожаат қилиш-қилмаслиги борасида ҳеч қанақа баёнот эълон қилмади.

Янги жиноят иши — ККФга нисбатан очилган хайриялар билан боғлиқ иккинчи ишдир. 2019 йил ёзида Москвадаги оммавий норозиликлар фонида ТҚ фонд ходимларига қарши пул ювиш ҳақида жиноят иши очган эди. Тергов версиясига кўра, 2016—2018 йилларда улар жиноий йўл билан қўлга киритилган нақд пулларни банкоматлар орқали турли банклардаги ҳисобларга киритган, сўнг бу маблағлар ККФга ўтказилган. Дастлаб бир миллиард рубль ҳақида гап борган, сўнг сумма 75 миллионгача туширилган. ККФ офисларида бир неча марта тинтув ўтказилган, фонд ходимлари сўроқ қилишга чақирилган. Ҳозирги пайтгача ҳеч кимга айблов эълон қилинмаган, иш ёпилгани ҳақида ҳам хабар берилмаган.