Buyuk Britaniya hukumati Britaniya-Shvetsiya kompaniyasi AstraZeneca va Oksford universiteti tomonidan birgalikda ishlab chiqarilgan vaksinadan foydalanishni ma’qulladi. Bu haqda Meduza xabar bermoqda.
“Klinik tekshiruvlar va tajribalarning batafsil tahlilidan so‘ng Dori vositalari va tibbiy buyumlar sifatini nazorat qilish boshqarmasi vaksina xavfsizlik, sifat va samaradorlikning standart me’yorlariga javob beradi degan xulosaga keldi”, — deb xabar bergan Buyuk Britaniya Sog‘liqni saqlash vazirligi.
Qayd etilishicha, vaksina bilan emlash 4-yanvardan boshlanadi. Britaniya 100 million doza vaksinaga buyurtma bergan — bu 50 million kishini emlash uchun yetadi.
Buyuk Britaniya AstraZeneca vaksinasini ro‘yxatdan o‘tkazgan dunyodagi birinchi davlat bo‘ldi. Avvalroq u AQShning Pfizer va Germaniyaning BioNTech kompaniyasi tomonidan ishlab chiqilgan vaksinalarni birinchilardan bo‘lib litsenziyalagandi.
Britaniya hukumati AstraZeneca va Oksford universiteti vaksinasini litsenziyalash uchun asos bo‘lgan tadqiqot natijalarini e’lon qilmadi. Bu uni Pfizer/BioNTech va AQShda tasdiqlangan Moderna vaksinasidan ajratib turadi.
Noyabr oyining oxirida AstraZeneca kompaniyasi Oksford universiteti bilan hamkorlikda ishlab chiqargan vaksinasi 70 foiz samaradorligi haqida e’lon qilgandi. Kompaniya vaksina turli emlash sxemalarida turlicha samaradorlik ko‘rsatganini bildirgan.
Xususan, odamlar vaksinaning dastlab yarimta dozasini olib, bir oydan so‘ng to‘liq dozasi bilan emlanganda 90 foiz samaradorlik ko‘rsatgan. Shu bilan birga, kamida bir oylik farq bilan to‘liq dozalarda emlangan ishtirokchilarda 62 foiz samaradorlik ko‘rsatgan. Vaksinaning ikkala sxemasi bo‘yicha umumiy samaradorligi 70 foizni tashkil etgan.
Buyuk Britaniyada aholini COVID-19’ga qarshi emlash 8-dekabrdan boshlandi.
Izoh (0)