Янги мавсумдаги янги номлар: 2020/21 йилги мавсумда ўзини танитган футболчилар ҳақида

2020/21 йилги мавсум узоқ вақт давомида кўпчиликнинг ёдида қолиши аниқ. Бунга етарлича сабаблар бор: биринчидан, мавсум кеч ва томошабинларсиз бошланди, иккинчидан, тақвим жуда тиғиз тузилган, ўйинлар оралиғидаги муддат жуда қисқа. Бундай шароитда кимдир ўзини яхши томондан намоён қилаётган бўлса, яна кимдир ҳанузгача оптимал формасини тиклай олгани йўқ. «Реал», «Барселона», «Ювентус» ва «Манчестер Сити» каби номдор жамоалар мавсумни жуда суст бошлади. Кўплаб футболчилар эса ё коронавирусга чалинди ёки жиддий жароҳатлар олди.

Аммо баъзи ўйинчиларда юқоридагиларнинг таъсири деярли сезилмади ва аксинча, улар дастлабки дақиқаларданоқ ўз мухлисларини хурсанд қилишни бошлади. Булар қаторига Криштиану Роналду, Златан Ибрагимович, Ҳарри Кейн, Роберт Левандовски ва бир қатор юлдузларни киритиш мумкин. Бироқ ҳозир улар тўғрисида эмас, балки 2020/21 йилги мавсумнинг бошида порлаган янги номлар ҳақида ҳикоя қилинади.

Тайлер Адамс («Лейпциг»)

Сўнгги йилларда топ-лигаларда америкалик футболчилар сони тобора кўпайиб бормоқда. Жумладан, «Нью-Йорк Ред Буллз»нинг собиқ вакили Тайлер Адамс ҳам Бундеслигадаги муваффақиятли легионерлардан бирига айланди.

2019 йилдан бери жамоада ўйнаётган Адамснинг дастлабки мавсумда ишлари юришмаганди, камига жароҳат олиб, етти ойга сафдан ҳам чиққанди. Юлиан Нагелсманн жамаога келганидан сўнг эса кўпчилик америкаликнинг клубдан кетишини тахмин қилганди, аммо бунинг акси содир бўлди: ёш мутахассис Тайлерга ишонч билдирди, гарчи ўзига бегона бўлган ҳимоя позицияда ўйнашга тўғри келган бўлса ҳам, Адамс мураббийни уялтириб қўймади.

Айнан у Чемпионлар Лигасидаги «Атлетико»га қарши ўйинда ғалаба голини урди. Тайлер майдонда ўз ўйинидан завқ олиб ўйнайди, шу билан бирга у бутун жамоанинг савиясини ҳам кўтаради. Маълумотларга кўра Тайлер футболдан ташқари таълим олишни ҳам канда қилмайди – ҳозирда у психология бўйича илмий иш олиб бормоқда.

«Баъзан тезкорлик билан мослаша олиш ва инстинктларга ишониш энг муҳими бўлиб қолади. Мураббийлар биздан тезда мослашиб, турли тактикаларда ўйнашимизни кутади. Шунинг учун мен ҳимояда бўлсам ҳам, ярим ҳимояга чиқиб, рақибларга босим ўтказа оламан».

Алессандро Бастони («Интер»)

2016/17 йилги мавсумда «Аталанта»да дебютини ўтказган Алессандро Бастони тезда Италиянинг энг иқтидорли ҳимоячиларидан бирига айланди.

21 ёшли «Интер» футболчиси ўзининг тўғри позиция танлай олиш маҳорати, тактик зукколиги ва ҳужумдаги фойдали ўйинлари билан ижобий таассурот қолдирмоқда. 2019/20 йилги мавсумда у 2 та гол уриб, Италия терма жамоасида ўз ўрнига эга бўлди.

Гарчи, «Интер» уч ҳимоячи, Италия эса тўрт ҳимоячи схемасини афзал кўрса-да, Бастони ҳар иккала услубга осонгина мослаша олади.

Узоқ вақтдан бери «Ливерпуль» қизиқиб келган футболчи аста-секинлик билан ўсиб бормоқда. Шубҳасиз, бунда унга Антонио Конте катта ёрдам бермоқда.

«Мен унинг қўл остида катта ўсишга эришганимдан мамнунман. Мен ҳам руҳан ҳам жисмонан ўсишга эришдим. Ўзимга бўлган ишончим ҳар қачонгидан устун».

Педри

Педри сўнгги йилларда «Барселона» академиясида етишиб чиққан энг ёрқин истеъдодлардан бири.

У эндигина 18 ёшга тўлган бўлишига қарамай, аллақачон Ла Лига ва Чемпионлар Лигасида гол уришга эришди. Рональд Куман бошчилигидаги муаммоли мавсумнинг босимига қарамай, у (жуда) яхши ҳаракат қилмоқда. Педрини ҳатто Месси билан ҳам таққослашмоқда! Ажабланарли ери йўқ, боиси йигитча камдан-кам ҳолатларда таркибдан тушиб қолади.

Педри ўзининг кўп қирралилиги ва тактик мослашувчанлиги билан ажралиб туради, шу туфайли Куман ундан ҳар иккала қанот ва ярим ҳимояда фойдаланиши мумкин. Ҳозирда у жамоадошлари Серхио Бускетс, Миралем Пьянич каби номдор футболчилардан кўпроқ ўйин ўтказишга улгурди.

Рис Жеймс («Челси»)

Рис Жеймснинг кутилмаганда «Челси»нинг асосий футболчисига айлангани кўпчиликни ҳайратга қўймай қолмади.

21 ёшли ҳимоячи аллақачон Англиянинг энг яхши ўнг қанот ҳимоячилари қаторида тилга олинмоқда. Агар у бундан ҳам кўпроқ голли узатмаларни амалга оширадиган бўлса, ҳатто Трент Александер-Арнольд ҳам хавотирлана бошлаши аниқ. Жеймснинг энг устун жиҳати, бу унинг кроссларидир. Шунингдек, у голлар ҳам уриб туради.

Шу билан бирга Жеймс ярим ҳимояда ва ҳаттоки ҳужумда ҳам яхши ўйнайди. «Аристократлар» устози Фрэнк Лэмпард ундан жудаям мамнун эканлигини яшириб ўтирмади:

«Унинг ўсиш суръати ҳайратланарли даражада. У «Уиган»да ўйнаганида, мен уни «Дерби»га жалб қилмоқчи эдим, аммо бу амалга ошмай қолганди. Доимо унга қойил қолганман. У янада ўсишни истайди, келажакда бундан-да кучлироқ бўлади деб ўйлайман».

Кёртис Жонс («Ливерпуль»)

Жонс ўзининг биринчи 2019/20 йилги мавсумида олтита ўйинда 1 та гол уриб, жамоасининг сўнгги 30 йилликдаги илк чемпионлигини қўлга киритишида ёрдам берганди.

19 ёшли ярим ҳимоячи 2020/21 йилги мавсумдан бошлаб, тез-тез ва яхшироқ ўйнай бошлади. Айнан у «Аякс» дарвозасига ғалаба тўпини киритиб, «Ливерпуль»ни Чемпионлар Лигаси плей-офф босқичига олиб чиқди. Шу билан бирга, у «қизиллар» тарихидаги учинчи энг ёш гол муаллифига айланди.

Кёртис, шубҳасиз, асосий жамоанинг футболчиси. Албатта, бу ҳали набираларга айтиб беришга арзийдиган ютуқ эмас, аммо унинг ёшидаги футболчи учун анчагина жиддий натижа ҳисобланади.