Telegram’да минг кишилик овозли чатлар пайдо бўлди

Telegram мессенжери маъмурияти гуруҳларда бир вақтнинг ўзида минг нафар фойдаланувчи мулоқот қилиши мумкин бўлган овозли чатларни ишга туширди. Meduza’нинг хабар беришича, бу ҳақда компания блогида эълон қилинди.

Аудиоконференцияни исталган гуруҳда ишга тушириш мумкин, фойдаланувчилар эса суҳбат пайтида ёзишмаларини давом эттира олади. Гуруҳ иштирокчиларнинг қайси бири овозли мулоқотда иштирок этаётгани кўриниб туради. Telegram’нинг Android версиясида мессенжер иловаси вақтинча ёпиб турилганда ҳам овозли суҳбатлар кўриниб туради.

Овозли чатни ишга тушириш учун гуруҳ администратори бўлиш лозим. Гуруҳ профилида «Яна» (учта нуқта)дан кейин «Овозли чат» тугмасини босиш лозим.

2020 йилнинг январь ойида Telegram чат ва каналларни алоҳида рукнга ажратиш функциясини синовдан ўтказишни бошлаганди. Август ойида эса Telegram Android’лар учун видеоқўнғироқлар функциясини ишга туширди.