БААнинг Абу-Даби амирлиги хорижий сайёҳларнинг амирликка кириш қоидаларини қайта кўриб чиқиб, пандемия сабабли киритилган баъзи чекловлар 24 декабрдан бекор қилинишини эълон қилди, дея хабар бермоқда «ТАСС».
Унга кўра, бир қатор давлатлар, жумладан, Ўзбекистоннинг амирликка келувчи фуқаролари 2 ҳафталик мажбурий карантинни ўташдан озод қилинди.
Маълум қилинишича, 2 ҳафталик мажбурий карантиндан биринчи навбатда «яшил рўйхат»га кирувчи давлат фуқаролари озод қилинади. Гап амирликка Ўзбекистон, Австралия, Бруней, Вьетнам, Греция, Гренландия, Гонконг, Хитой, Мавритания, Малайзия, Янги Зеландия, Саудия Арабистони, Сингапур, Тожикистон, Тайван, Таиланддан келувчи сайёҳлар ҳақида бормоқда. Ушбу рўйхатда бўлмаган давлатлар фуқароларига карантин муддати 10 кунгача камайтирилган.
Барча сайёҳлар амирликка кириш учун 96 соатдан ошмаган вақт ичида топширилган манфий ПЗР-тест тақдим қилишлари ва у ерда яна битта тест топширишлари лозим. Бундан ташқари, амирликда кўпроқ муддатга қоладиган хорижликлар бир неча кундан кейин такрорий ПЗР-тест топширишлари керак бўлади. Аввал такрорий тестлар амирликка келгандан кейин 4 ва 8-кун топширилган бўлса, энди 6 ва 12-кун топширилади.
Амирлик маъмуриятида маълум қилинишича, «яшил рўйхат» ҳар 2 ҳафта қайта кўриб чиқилади.
Шу билан бирга, Абу-Даби БААнинг бошқа амирликларидан келувчилар учун ҳам бир қатор чекловларни енгиллаштирган. Жумладан, бу енгиллаштиришлар ПЗР-тестнинг амал қилиши ва унинг такрорий топширилиши муддатлари билан боғланган. Бундан ташқари, савдо ва кўнгилочар марказлар, ресторанлар ва болалар боғчаларига қўйиладиган санитар талаблар янгиланган.
Хорижликларнинг кириши учун Абу-Дабидагидан ўзгача қоидалар амал қилувчи Дубай амирлигида эса 23 декабрдан коронавирусга қарши бепул эмлаш бошланади.
БААда пандемия бошидан бери 195 мингдан кўпроқ касалланиш ҳолати қайд қилинган. Бу вақт ичида коронавирусдан 642 киши вафот этган. Айни вақтда мамлакатда 23,8 минг киши вирусдан даволанмоқда.
Аввалроқ Ўзбекистон COVID-19’нинг янги варианти аниқланган Буюк Британия ва яна етти давлат билан авиарейсларни тўхтатгани ҳақида хабар берилганди. Шунингдек, Ўзбекистонга кириб келаётганлар коронавирусга қарши антитанани аниқлаш учун ўз ҳисобидан экспресс тест топшириши белгилангани маълум қилинган.
Изоҳ (0)