23-чақириқ Кнессет (Исроил парламенти) 2020 йил учун мамлакат давлат бюджетини тасдиқлаш муддати ўтгани туфайли автоматик тарзда тарқатиб юборилди, деб ёзади «РБК». Қонунчиликка кўра, муддатидан аввалги парламент сайловлари 23 март куни бўлиб ўтиши керак.
«Мен ҳаммани кескинликни кучайтиришдан тийилишга ҳамда сайлов кампанияси ташкиллаштирилган ҳолда, зўравонлик ўтказилмаган ҳолатда бўлиб ўтиши ва тугаши учун бор имкониятни ишга солишга чақираман», — деди Кнессет спикери Ярив Левин парламент автоматик тарзда тарқатилганини эълон қилаётиб.
Шу тариқа Исроилда икки йил ичидаги тўртинчи навбатдан ташқари парламент сайловлари ўтказилиши кутилмоқда. Аввалги сайловларда ўнг ва сўл партиялар парламентда деярли бир хил миқдорда ўринларга эга бўлган, бу эса ҳукумат шаклланишига тўсқинлик қилган эди.
2020 йил мартидаги сайловлардан кейин Исроил бош вазири Бинямин Нетаньяхунинг «Ликуд» партияси ва Бош штаб собиқ раҳбари Бени Ганснинг «Кахол-Лаван» партияси ротация асосидаги ҳукуматни шакллантириш бўйича музокаралар олиб борди, улар апрель охирида муваффақиятли якунланди.
Шундан кейин парламент янги коалицион ҳукумат таркибини тасдиқлади. Нетаньяху 18 ойга бош вазир бўлиб қолиши керак эди. Муддатнинг иккинчи ярмида эса ҳукумат раҳбари ўринбосари лавозимини эгаллаб турган Ганс Исроил бош вазири бўлиши керак эди, Нетаньяху шунда унинг лавозимига ўтар эди. Кнессет лавозимлар алмашадиган санани 2021 йил 17 ноябрь этиб белгилади.
Мавзуга доир:
- Исроил коронавируснинг янги штамми сабабли хорижликларнинг мамлакатга киришини тақиқлайди
- Исроил бош вазири онлайн эфирда Pfizer вакцинаси билан эмланди
- Дональд Трамп Марокаш ва Исроил ўртасида дипломатик алоқалар ўрнатилганини маълум қилди
- Исроил ҳарбийлари АҚШнинг Эронга амалга оширадиган эҳтимолий ҳужумига тайёрланмоқда
Изоҳ (0)