Twitter маъмурияти Америка президенти расмий аккаунти @POTUS ва Оқ уй расмий аккаунти @WhiteHouse’нинг мавжуд обуначиларини АҚШнинг сайланган президенти Жо Байденга ўтказмайди. Бу ҳақда Байденнинг рақамли коммуникациялар бўйича вакили Роб Флаэрти маълум қилди, деб ёзади Meduza.
Байденнинг жамоаси Business Insider нашрига аниқлик киритишича, Байденга биринчи хонимнинг @FLOTUS ва Оқ уй матбуот котибининг @PressSec расмий Twitter-саҳифаларининг мавжуд обуначилари ҳам берилмайди.
Twitter Байден ҳамда унинг маъмуриятида вице-президентга айланадиган Камала Харриснинг шахсий саҳифалари обуначиларига билдиришнома юбориб, Байденнинг ўтиш даври жамоаси расмий саҳифаси @transition46’га обуна бўлиш имконияти ҳақида маълум қилади. Кейинчалик бу аккаунт Оқ уйнинг расмий саҳифаси сифатида @WhiteHouse деб ўзгартирилади.
Twitter расмий вакили Ник Пачилио The Wall Street Journal’га маълум қилишича, Байден АҚШ президенти билан боғланган жами 12 та расмий аккаунтни қўлга киритади. Пачилионинг қўшимча қилишича, ижтимоий тармоқ Байденнинг жамоаси билан аккаунтларга алоқадор «бир қатор жиҳатлар бўйича» музокараларни давом эттирмоқда.
Расмий Twitter саҳифаларининг жорий обуначилари нима сабабдан Байденга берилмаслиги номаълум. Флаэрти таъкидлашича, 2016 йилда амалдаги президент Дональд Трампга @POTUS ва @WhiteHouse аккаунтларининг обуначилари ундан аввалги президент Барак Обаманинг илтимоси билан берилган эди. The Washington Post журналисти Хьюго Лоуэлл ўз Twitter’ида Байденнинг жамоасига таяниб ёзишича, обуначиларнинг янги АҚШ президентига берилишидан Трамп аккаунтларининг администратори бош тортган.
Барак Обама расмий коммуникациялар учун Twitter’дан фойдаланишни бошлаган биринчи амалдаги АҚШ президентига айланган. У фойдаланган @POTUS саҳифаси у лавозимдан кетганидан кейин @POTUS44’га ўзгартирилган ва музлатилган. Ўша вақтда унинг 13,7 миллион обуначиси бўлган.
Дональд Трамп учун янги @POTUS аккаунти тузилган. Унинг ваколатлари тугаши билан саҳифа @POTUS45 деб қайта номланади ва музлатилади.
Айни пайтда @POTUS аккаунтига 33,2 миллион киши обуна бўлган. @WhiteHouse саҳифасида 26 миллион, @FLOTUS’да 16,4 миллион, @PressSec’да эса 6,3 миллион обуначи бор.
Дональд Трамп Twitter’дан фаол равишда фойдаланади, бироқ ўз баёнотларини расмий саҳифада эмас, ўзининг шахсий аккаунтида эълон қилиб боради. Трампнинг @realDonaldTrump шахсий саҳифасига 88,5 миллион киши обуна бўлган. Жо Байденда эса 21,6 миллион обуначи бор.
2021 йил 20 январь куни сайланган давлат раҳбари демократ Жо Байден ўз лавозимига киришиши керак. Декабрь ўрталарида сайловчилар ҳайъати Трампнинг сайловдаги бош рақибини Американинг 46-президенти деб эълон қилди. Байденнинг инаугурацияси анъанага кўра Вашингтонда бўлиб ўтади.
Амалдаги Америка етакчиси ўз рақибининг ғалабасини тан олишдан бош тортиб, ҳамон сайлов натижалари юзасидан судларда даъволашишга уринмоқда. CNN ўз манбаларига таяниб хабар беришича, Трамп «чуқур эътироз» лаҳзаларида жазавага тушиб, Байденнинг инаугурацияси куни Оқ уйни тарк этмаслигини айтмоқда.
Байден эса ўз рақибини баъзи штатлардаги сайлов якунларини суд орқали бекор қилишга уриниб, бу билан халқ хоҳишига ҳурматсизлик кўрсатаётганликда айблади.
Изоҳ (0)