Дональд Трамп Россиянинг Америкадаги сайловларга аралашуви иши бўйича айбланган икки кишини афв этди

АҚШнинг амалдаги президенти Дональд Трамп 15 кишини афв этиш ва яна беш кишига нисбатан ҳукмларни қисман ёки бутунлай юмшатиш тўғрисидаги фармонни имзолади, деб ёзади Meduza.

Афв этилганлар рўйхатига Россиянинг АҚШ президенти сайловларига аралашуви ҳақидаги ишнинг икки фигуранти кирди. Булар — Трамп сайловолди штабининг собиқ маслаҳатчиси Жорж Пападопулос ва Нидерландия фуқароси, россиялик бизнесмен Герман Ханнинг куёви Алекс ван дер Цваан. Уларнинг иккаласи ҳам махсус прокурор Роберт Мюллернинг текшируви доирасида ёлғон кўрсатмалар берганликда айбланган эди.

2018 йил сентябрда Пападопулос Федерал қидирув бюросига (ФҚБ) россиялик юқори мансабли амалдорлар билан боғлиқлигини даъво қилган одамлар билан алоқалари ҳақида ёлғон кўрсатмалар берганлик айблови билан жазога ҳукм қилинган эди. Махсус прокурор Роберт Мюллернинг «Россия иши» ҳақидаги маърузасида айтилишича, Пападопулос, гўёки, Россия ҳукуматида ҳомийлари бўлган британиялик профессор Жозеф Мифсуд билан музокаралар олиб борган.

ФҚБ собиқ раҳбари Жеймс Коми «Россия иши» бўйича текширув бошланиши учун Жорж Пападопулоснинг Лондондаги одам билан «русларнинг қўлида бўлган ва Хиллари Клинтонга зарар етказиши мумкин бўлган ўғирланган ёзишмалар» ҳақида суҳбатлашгани бўйича пайдо бўлган маълумот асос бўлган.

Ноябрда Дональд Трамп хавфсизлик бўйича собиқ маслаҳатчиси, Россия билан алоқалар бўйича ФҚБга ёлғон ахборот берганликда айбланган Майкл Флинни афв этган эди. Июлда эса «Россия иши» доирасида ёлғон кўрсатма беришда айбланган қадрдон дўсти ва маслаҳатчиси Рожер Стоунга белгиланган жазони енгиллаштирувчи қарорни имзолади.