Испания ва Хорватияда 23 декабрдан коронавирус инфекцияси билан касалланганлар сони ўсиши туфайли мамлакат ичида шаҳарлараро қатнаш тақиқланди, деб ёзади «РБК».
Хорватия ҳукумати қарорига кўра, чекловлар 8 январгача узайтирилади. Касби юзасидан ёки шошилинч ишлар чиқиб қолган тақдирда бошқа шаҳарга кетишга мажбур бўлиб қолган одамлар учун махсус рухсатномалар кўзда тутилади. Шаҳарлараро қатновни чеклашдан ташқари, ҳукумат уйда ўн кишидан ортиқ одам иштирокида тадбирлар ўтказишни ҳам тақиқлади. Ҳужжатда қайд этилишича, битта бинода кўпи билан иккита оила тўпланиши мумкин. Оммавий тадбирлар учун Хорватияда рухсат берилган. Маҳаллий аҳоли 24 ва 25 декабрь кунлари ўтказиладиган Рождество ибодатларида иштирок эта олади.
Ҳудудлараро қатновлар билан боғлиқ чекловлар Испания ҳукумати раиси Педро Санчес томонидан ҳам қабул қилинди. Ушбу тавсиялар миллий режада тасдиқланган эди. Улар 23 декабрдан 6 январгача давом этиши керак. Бироқ El Pais газетаси ёзишича, ҳудудий ҳукуматлар ушбу қоидаларни ўзларига мослаштириши мумкин. Аввалроқ Рождество байрамлари вақтида чегарани кириш ва чиқиш учун ёпиб қўйиш нияти ҳақида Валенсия ҳукумати хабар берганди.
Жаҳон соғлиқни сақлаш ташкилоти (ЖССТ) маълумотларига кўра, пандемия бошидан буён Испанияда 1 миллион 797,2 мингдан ортиқ кишида коронавирус аниқланган. 48,9 мингдан зиёд бемор вафот этган. Хорватияда эса 195,7 минг киши касалланган, 3275 киши вафот этган.
Бир қатор Европа мамлакатлари Рождество ва Янги йил байрамлари куни ҳам амалда бўладиган чекловларни жорий қилмоқда. Хусусан, Англия шарқида ва жануби-шарқида, шу жумладан, Лондонда ҳам 20 декабрдан чекловларнинг янги, тўртинчи даражаси амал қилишни бошлади. Янги чекловлар камида икки ҳафта амал қилади. Улар коронавируснинг янги тури тарқалгани туфайли жорий этилмоқда. Германияда коронавирус билан боғлиқ оғир вазият туфайли 16 декабрдан бошлаб камида 10 январга қадар давом этувчи қатъий локдаун жорий этилди. Франция бош вазири Жан Кастекс эса мамлакатда 15 декабрдан комендантлик соатини эълон қилди, у соат 20:00 дан соат 06:00 гача амал қилади. Комендантлик соати Янги йил кечаси ҳам кучда бўлади.