Транспортдан бепул фойдаланиш ҳуқуқига эга бўлган шахсларнинг ягона гувоҳномалари 1 январдан ўз кучида қолади — «Тошшаҳартрансхизмат»
Шаҳар йўловчи транспортидан бепул фойдаланиш ҳуқуқига эга бўлган шахсларнинг ягона гувоҳномалари 1 январдан ўз кучида қолади. Бу ҳақда «Тошшаҳартрансхизмат» матбуот хизмати хабар бермоқда.
«Шаҳар йўловчи транспортидан (таксидан ташқари) бепул фойдаланиш ҳуқуқига эга бўлган шахсларнинг ягона гувоҳномалари 2021 йилнинг 1 январидан ўз кучида қолади. Яъни мазкур гувоҳномалар 2021 йилнинг 1 январидан электрон шаклга ўтказилмайди», — дейилади хабарда.
Эслатиб ўтамиз, мамлакатда жамоат транспорти тарифлари учун автоматлаштирилган тўлов тизими январь ойидан жорий этила бошланди. Шу мақсадда ерусти транспортида ва метрода махсус валидаторлар ўрнатилди. Лойиҳанинг қиймати 12 миллион долларга баҳоланган. Тошкентда 1 декабрдан бошлаб электрон транспорт картаси нархи 15 минг сўм этиб белгиланган.
Шаҳар транспортидан бепул фойдаланишни тартибга солиш тўғрисидаги қонунга мувофиқ, қуйидаги шахслар шаҳар йўловчи транспортидан (таксидан ташқари) бепул фойдаланиш ҳуқуқига эга:
- 1941–1945 йиллардаги уруш қатнашчилари жумласидан бўлмиш ҳарбий хизматчилар;
- 1941–1945 йиллардаги уруш ногиронлари ва урушнинг I гуруҳ ногиронига ҳамроҳлик қилувчи шахс;
- 1941–1945 йиллардаги уруш даврида фронт ортида фидокорона меҳнати ва бенуқсон ҳарбий хизмати учун орден ва медаллар билан тақдирланган шахслар;
- Афғонистонда ва бошқа мамлакатларнинг ҳудудидаги жанговар ҳаракатларда қатнашган собиқ байналмилалчи жангчилар жумласидан бўлмиш фуқаролар;
- ҳақиқий муддатли ҳарбий хизматни ўтаётган ҳарбий хизматчилар ва контракт бўйича оддий аскарлар ҳамда сержантлар таркибидаги ҳарбий хизматчилар;
- Чернобиль АЭС ҳалокати оқибатида нурланиш касаллигига чалинган ва уни бошдан кечирган шахслар;
- кўзи ожиз ногиронлар ва кўзи ожиз ногиронга ҳамроҳлик қилувчи шахс.
