Азиз Абдуҳакимов Tashkent City Park ҳудудига кириш пуллик қилиб қўйилганига муносабат билдирди
2020 йилнинг 17 декабридан бошлаб Tashkent City Park ҳудудига кириш пуллик қилиб қўйилди. Мазкур боғ ҳудудини томоша қилиш учун белгиланган нархлар ижтимоий тармоқларда кескин баҳс-мунозараларга сабаб бўлмоқда. ОАВ вакиллари ушбу ҳолат юзасидан Туризмни ривожлантириш давлат қўмитаси раҳбари Азиз Абдуҳакимовнинг муносабатига қизиқиб, унга бир қанча савол билан юзланди.
Эслатиб ўтамиз, 17 декабрдан бошлаб Tashkent City боғига байрам арафаси ва Янги йил кунларида кириш пуллик этиб белгиланди. Байрам чипталари нархи 5 ёшгача бўлган болаларга — бепул, 5 ёшдан 12 ёшгача бўлган болалар учун — 5 000 сўм, 12 ёшдан катталар учун — 10 000 сўм, пенсионерларга — 5 000 сўм (гувоҳнома мавжуд бўлган тақдирда), ногиронлиги бўлган шахсларга — бепул (гувоҳнома мавжуд бўлган тақдирда), енгил автомобилда кириш — 20 000 сўм (йўловчиларни ҳисобга олган ҳолда) этиб белгиланган.
«Tashkent City дирекцияси тижорий ташкилот. Нима учун пуллик этиб белгиланганлиги тўғрисида унинг эгаларидан ҳам сўраб кўриш керак. Бу ҳолатни ҳали ўрганмасдан туриб, хулоса бериш қийин. Қолаверса, Tashkent City дирекциясининг ҳақ-ҳуқуқлари бўйича бу тўғри ёки нотўғри, деб қарор чиқарсак ҳам хато бўлади. Балки, уларнинг кундалик, масалан, чиройлиги ёки ҳаммани ўзига жалб қилиб туришлигини сақлаб қолиш мақсадида сарфланадиган қандайдир харажатлари кўпайгандир. Бунинг аниқ сабабларини ўрганиш лозим. Бошқа боғларга борсангиз ҳам, айниқса, хусусий боғларнинг барчаси киришни пуллик қилиб қўйган», — деди у.
Абдуҳакимов «Бу ҳолатни ички туризмга таъсири тўғрисида нима дея оласиз?», деган саволга қуйидагича жавоб берди:
«Туризм шундай нарсаки, дунёнинг қаерига борсангиз ҳам тарихий обидаларни кўриш, зиёрат қилиш ёки эсдалик совғалари сотиб олиш учун барибир харажат қиласиз. Tashkent City Park ҳудуди жуда кўп одамларни ўзига жалб қилади. Ҳақиқатан чет элга боришга имконияти йўқ аҳоли, айниқса, вилоятлик кўплаб ҳамюртларимиз шу ерга келишади. Боққа киришнинг пуллик қилиб қўйилгани бўйича юқорида айтганимдек, мутасаддиларнинг ўзидан аниқ изоҳ олиш керак», — деди бош вазир ўринбосари.
Аввалроқ Tashkent City халқаро ишбилармонлик дирекцияси раҳбари Баҳром Ризаев боққа кириш нима учун пуллик бўлганига изоҳ берган эди.
Маълумот учун, 2019 йилнинг октябрь ойида Жаҳонгир Ортиқхўжаев Tashkent City очилиши муносабати билан қилган видеомурожаатида «Бу — халқимиз учун. Бу жой — миллатимиз учун. Илоҳим, миллатимизга ушбу яхши жой буюрсин! Халқимиз келиб, яйрасин! Фарзандлари билан ўйнаб, кулсин! Ҳаммаси халқимиз, Ўзбекистон халқи учун ва азиз, меҳрибон миллатимиз учун!», деган эди.
