Австрия ҳарбий кинология маркази ишлатилган тиббий ниқобларда коронавирус инфекциясини ҳиди орқали топишга ўргатилган биринчи хизмат итини таништирди, деб ёзади «РБК» Австрия мудофаа вазирлигига таяниб.
Фото: Австрия мудофаа вазирлиги матбуот хизмати
Вирус бор-йўқлигини аниқлаш биринчи бўлиб, Зеталблик шаҳридаги Fantacy Forever лақабли Бельгия овчаркаси ўрганди. У итлар COVID-19’га чалинганларни соғлом одамлардан ажрата олиш-олмаслигини кўрсатиб бериши керак бўлган махсус тадқиқот дастурида қатнашмоқда.
Овчарка синовларнинг биринчи босқичидан ўтган, энди амалий босқич бошланган. Итни ўргатиш учун олти ой вақт ва минг дона ҳимоя ниқоби керак бўлди.
Яна бир ит синовларнинг биринчи босқичини тез орада якунлайди. 2021 йилгача австриялик кинологлар яна иккита итни тайёрлашни режалаштирмоқда. Тадқиқот якунлари келаси йилнинг биринчи чорагида эълон қилинади.
Финляндиянинг Хельсинки-Вантаа аэропортида ишлаётган итлар коронавирусни тестлардан кўра тезроқ аниқлаётгани хабар берилган эди. Синов жараёнида бир кун давомида итдан фойдаланган ҳолда 100 га яқин йўловчи текширувдан ўтказилган. Аэропортга келган йўловчилардан навбатга туриш ва терисини салфетка билан артиш сўралган. Шундан сўнг салфеткалар банкага жойлаштирилиб, итларга ҳидлаш учун берилган. Ҳайвонлар маълум бир ҳаракатлар билан касаллик эҳтимоллигини кўрсатишга ўргатилган. Агарда ит ходимларни «тест ижобий» эканлиги тўғрисида огоҳлантирса, йўловчи ПЗР-текширувдан ўтиши керак.
Дубай аэропортида ҳам COVID-19’ни аниқлаш учун ҳарбий хизмат итларидан фойдаланилаётгани тўғрисида хабар берилганди. Жараёнга кўра итлар коронавирус билан касалланган йўловчиларни ҳидидан топиб беради. Тадқиқотларда ушбу йўл орқали касалланганларни 92 фоиз гача аниқлаш мумкинлиги исботланган.
