Туркия коронавирусга қарши Хитой вакцинасини шошилинч равишда сотиб олишга тайёрланмоқда. Бу ҳақда мамлакат ташқи ишлар вазири Мавлут Чавушўғлу Хитой ТИВ раҳбари Ван И билан бўлиб ўтган телефон суҳбатида маълум қилган, деб хабар беради «Коммерсантъ». Анқара Хитой вакцинасини хавфсиз ва самарали деб ҳисобламоқда.
«Чавушўғлу Туркия томони Хитой вакцинасини хавфсиз ва самарали деб ҳисоблашини маълум қилиб, Хитой вакцинасини шошилинч равишда сотиб олишини, Хитой билан ушбу масалада ҳамкорликни кучайтиришга тайёр эканлигини маълум қилган», — дейилади Хитой ТИВ сайтида. Шунингдек, таъкидланишича, Чавушўғлу Хитойни пандемияга қарши муваффақиятли кураш билан табриклаган ва мамлакатнинг вакцина тадқиқоти ҳамда яратилишида эришган ютуқларини юқори баҳолаган.
Хитойда коронавирусга қарши вакцинани яратиш билан SinoVac компанияси шуғулланмоқда. Вакцина устидаги ишлар январда бошланган. Дори воситаси ҳозирда Бразилия, Индонезия ва Туркияда клиник синовларнинг учинчи босқичидан ўтказилмоқда. Индонезиянинг Bio Farma давлат фармацевтика компанияси Хитой вакцинасининг самарадорлигини 97 фоизга баҳолаган.
Аввалроқ Перуда коронавирусга қарши Хитой вакцинасининг клиник синовлари тўхтатилгани тўғрисида хабар берилганди.
Мавзуга доир: Туркия соғлиқни сақлаш вазири Россия вакцинасидан воз кечилгани ҳақидаги хабарларни рад этди
Изоҳ (0)