Трамп АҚШ бош прокурорининг истеъфоси ҳақида эълон қилди

АҚШ адлия вазири, бош прокурор Уильям Барр 23 декабрь куни ўз лавозимини тарк этади. Унинг биринчи ўринбосари Жефф Розен бош прокурор вазифасини вақтинчалик бажарувчи бўлади. Бу ҳақда амалдаги давлат раҳбари Дональд Трамп эълон қилди, деб ёзади Meduza.

«Ҳозиргина Оқ уйда бош прокурор Билл Барр билан жуда ёқимли учрашув ўтказдим. Бизнинг муносабатларимиз жуда яхши эди, у ўз ишини аъло даражада бажарди! Билл ўз хатида лавозимидан Рождество арафасида кетиши, байрамни оиласи даврасида ўтказиши ҳақида ёзган», — дея қайд этди Трамп ўз Twitter’ида.

Нашр эслатишича, аввалроқ Америка ОАВлари президент бош прокурордан норози эканлигини, бунга унинг президент сайловларида катта кўламли фирибгарликлар бўлмагани ҳақида оммага эълон қилгани сабаб бўлганини ёзган эди.

Бош прокурорнинг истеъфоси ҳақидаги хабарлар сайловчилар ҳайъатидаги овоз бериш якунлари билан бир вақтда пайдо бўлди.

Эслатиб ўтамиз, сайловчилар ҳайъати кўпчилик овоз билан демократ Жо Байденни АҚШ президенти сайловларининг ғолиби дея тасдиқлади. 23 декабргача сайловчилар ҳайъати овозларидан иборат бюллетенлар Вашингтонга етказилади. 2021 йил 6 январь куни овозлар АҚШ Конгресси Вакиллар палатаси ва Сенатнинг қўшма мажлисида ҳисоблаб чиқилади. 20 январь куни сайланган президентнинг инаугурацияси бўлиб ўтади.

Сайловлардан кейин Дональд Трамп овоз бериш натижаларини тан олмади ва улар юзасидан судга даъво берди. Унинг ҳуқуқшунослари судларга ўнлаб турли даъволар билан мурожаат қилиб, овозларни қайта санаш ёки натижаларни бекор қилишни талаб қилди. Судлар улардан баъзиларинигина қондирди, аммо бу сайлов натижаларига аҳамиятли таъсир ўтказмади.

Ноябрь охирида Трамп журналистларга агар сайловчилар ҳайъати Жо Байденга овоз берса, Оқ уйдан кетишини айтганди.