Ўзбекистонда озиқ-овқат маҳсулотлари сифати ва хавфсизлик даражаси қандай?

Ўзбекистон озиқ-овқат маҳсулотларининг айрим турларини экспорт ва импорт қилади. Бу жараёнда маҳсулотларнинг сифати ва хавфсизлигини текшириш муҳим саналади. Шу масала бўйича 10 декабрь куни «Озиқ-овқат маҳсулотларининг сифати ва ҳавфсизлиги тўғрисида»ги қонунниг жойларда қанчалик ижро этилаётгани юзасидан Олий Мажлис Сенати Аграр, сув хўжалиги масалалари ва экология қўмитасининг мажлиси бўлиб ўтди.

Таъкидланишича, бугунги кунда озиқ-овқат товарларини импорт қилувчи корхоналар сони 1 минг 601 тага етган. Улар томонидан биргина январь—сентябрь ойларида 1 миллиард 200 миллион АҚШ долларлик буғдой маҳсулоти импорт қилиниб, 2019 йилга қараганда 28 фоизга ошган. Бошқа турдаги озиқ-овқат маҳсулотлари импорти эса 1 миллиард АҚШ долларидан ошиб, асосан Қозоғистон, Россия, Беларусь, Малайзия ва Украинадан олиб келинган.

«Ўзбекистонга импорт орқали кириб келаётган маҳсулотларнинг сифати нафақат биз учун, балки фарзандларимиз, яқинларими учун ҳам муҳим ўрин эгаллайди. Буни назорат қилиш эса божхоначилар виждонига боғлиқ. Маҳсулотларни импорт қилиш билан бирга экпорт қилиш назорати ҳам бирдек зарур. Мана яқинда Фарғона ва бошқа ҳудудлардан Россияга экспорт қилинаётган қалампир ва помидор маҳсулотларининг сифати ёмонлиги ва экспортдан қайтгани ижтимоий тармоқларда тарқалди. Бундай ҳолатлар Ўзбекистоннинг имижига салбий таъсир кўрсатиб, меҳнаткаш деҳқонларга зарар етказмоқда», – деди сенатор Баҳтиёр Тожиев.

Маълум қилинишича, январь—сентябрь ойларида Тошкент шаҳри ва вилоятига 12 ярим минг тоннага яқин мол гўшти, 20 ярим минг тоннадан ортиқ парранда гўшти, 12 минг тоннага яқин сут ва сут маҳсулотлари, 15 минг тоннага яқин балиқ ва балиқ маҳсулотлари олиб кирилган.

Қолаверса, озиқ-овқат маҳсулотларининг сифати ва хавфсизлигига доир ҳамда чорвачилик маҳсулотларини ишлаб чиқариш, тайёрлаш, харид қилиш, қайта ишлаш, етказиб бериш, сақлаш, ташиш ва реализация қилишда белгиланган норма ва қоидаларни бузганлиги сабабли 2019 йилда ветеринария санитария экспертиза лабораториялари ва ветеринария участкалари томонидан қарийб 2 ярим минг нафар шахс жавобгарликка тортилган.

Жумладан, озиқ-овқат маҳсулотларини четдан кириб келишини назорат қилиш лозим даражада йўлга қўйилмаганлиги оқибатида Тошкент шаҳри бозорларига 20 хил сифатсиз, ёрлиқ номувофиқлигида мавжуд бўлган ҳамда яроқлилик муддатлари кўрсатилмаган озиқ-овқат маҳсулотлари импорт қилинган.

Мажлисда, бозорларда сифатсиз импорт маҳсулотларнинг тарқалаётганига яна бир сабаби божхонада маҳсулотлар 3-4 кунлаб қолиб кетаётганлиги айтилди.