O‘zbekiston oziq-ovqat mahsulotlarining ayrim turlarini eksport va import qiladi. Bu jarayonda mahsulotlarning sifati va xavfsizligini tekshirish muhim sanaladi. Shu masala bo‘yicha 10-dekabr kuni “Oziq-ovqat mahsulotlarining sifati va havfsizligi to‘g‘risida”gi qonunnig joylarda qanchalik ijro etilayotgani yuzasidan Oliy Majlis Senati Agrar, suv xo‘jaligi masalalari va ekologiya qo‘mitasining majlisi bo‘lib o‘tdi.
Ta’kidlanishicha, bugungi kunda oziq-ovqat tovarlarini import qiluvchi korxonalar soni 1 ming 601 taga yetgan. Ular tomonidan birgina yanvar—sentabr oylarida 1 milliard 200 million AQSh dollarlik bug‘doy mahsuloti import qilinib, 2019-yilga qaraganda 28 foizga oshgan. Boshqa turdagi oziq-ovqat mahsulotlari importi esa 1 milliard AQSh dollaridan oshib, asosan Qozog‘iston, Rossiya, Belarus, Malayziya va Ukrainadan olib kelingan.
“O‘zbekistonga import orqali kirib kelayotgan mahsulotlarning sifati nafaqat biz uchun, balki farzandlarimiz, yaqinlarimi uchun ham muhim o‘rin egallaydi. Buni nazorat qilish esa bojxonachilar vijdoniga bog‘liq. Mahsulotlarni import qilish bilan birga ekport qilish nazorati ham birdek zarur. Mana yaqinda Farg‘ona va boshqa hududlardan Rossiyaga eksport qilinayotgan qalampir va pomidor mahsulotlarining sifati yomonligi va eksportdan qaytgani ijtimoiy tarmoqlarda tarqaldi. Bunday holatlar O‘zbekistonning imijiga salbiy ta’sir ko‘rsatib, mehnatkash dehqonlarga zarar yetkazmoqda”, – dedi senator Bahtiyor Tojiyev.
Ma’lum qilinishicha, yanvar—sentabr oylarida Toshkent shahri va viloyatiga 12 yarim ming tonnaga yaqin mol go‘shti, 20 yarim ming tonnadan ortiq parranda go‘shti, 12 ming tonnaga yaqin sut va sut mahsulotlari, 15 ming tonnaga yaqin baliq va baliq mahsulotlari olib kirilgan.
Qolaversa, oziq-ovqat mahsulotlarining sifati va xavfsizligiga doir hamda chorvachilik mahsulotlarini ishlab chiqarish, tayyorlash, xarid qilish, qayta ishlash, yetkazib berish, saqlash, tashish va realizatsiya qilishda belgilangan norma va qoidalarni buzganligi sababli 2019-yilda veterinariya sanitariya ekspertiza laboratoriyalari va veterinariya uchastkalari tomonidan qariyb 2 yarim ming nafar shaxs javobgarlikka tortilgan.
Jumladan, oziq-ovqat mahsulotlarini chetdan kirib kelishini nazorat qilish lozim darajada yo‘lga qo‘yilmaganligi oqibatida Toshkent shahri bozorlariga 20 xil sifatsiz, yorliq nomuvofiqligida mavjud bo‘lgan hamda yaroqlilik muddatlari ko‘rsatilmagan oziq-ovqat mahsulotlari import qilingan.
Majlisda, bozorlarda sifatsiz import mahsulotlarning tarqalayotganiga yana bir sababi bojxonada mahsulotlar 3-4 kunlab qolib ketayotganligi aytildi.
Izoh (0)