Фарғонада икки туп чинор ва бир туп тол дарахтини кестирган боғча мудирасига 15 миллион сўм жарима ёзилди, дея хабар бермоқда «Дарё» мухбири.
Маълум бўлишича, Учкўприк туманидаги 11-сонли мактабгача таълим ташкилоти ҳудудида икки туп чинор ва бир туп тол дарахти ноқонуний равишда кесилган. Диаметри 50 ва 90 сантиметр бўлган икки туп чинор дарахти 15-20 йиллик бўлган.
Учкўприк туман Экология ва атроф-муҳитни муҳофаза қилиш бўлими инспекцияси давлат инспекторлари томонидан ўтказилган тезкор рейд тадбирларида мазкур ишни боғча мудираси М.А. содир этгани маълум бўлган.
Ҳолат юзасидан 11-сонли МТТ мудирасига нисбатан Маъмурий жавобгарлик тўғрисидаги кодекснинг 79-моддаси 1-қисми (Дарахтлар, буталарни, бошқа ўрмон ўсимликлари ва ниҳолларни ғайриқонуний равишда кесиш, шикастлантириш ёки йўқ қилиш)га асосан 2 миллион 230 минг сўм маъмурий ҳамда 13 миллион 45 минг 500 сўм миқдорида ўсимлик дунёсига етказилган зарар сифатида жарима ҳисобланган. Маъмурий баённома расмийлаштирилиб, судга тақдим қилинган. Боғча мудирасининг айби исботланса, у 15 миллион 275 минг 500 сўм жарима тўлайди.
Изоҳ (0)