Андижон вилояти Бўстон тумани ҳудудидан ўтувчи А 373 автомобиль йўлининг Андижон—Тошкент йўналишида йўл четида тўхтаб турган иккита Lacetti’да қиймати, тахминан, 11,5 миллион сўм бўлган пиротехника воситалари борлиги аниқланган. Бу ҳақда «Дарё»га Андижон вилоят ИИБ ахборот хизмати хабар берди.
Маълум қилинишича, 2020 йил 2 декабрь куни соат 03:30 да Бўстон туман ички ишлар бўлими ҲПБ профилактика инспекторлари К.Отахонов, Н.Раҳмонов, О.Абдулазизов ҳамда туман ИИБ йўл ҳаракати хавфсизлик гуруҳи катта инспектори Б.Азимжонов ҳамкорлигида ўтказилган рейд тадбирида туман ҳудудидан ўтувчи А 373 автомобиль йўлида тўхтаб турган 21 ёшли фуқаро Б.С. ҳамда 35 ёшли фуқаро Ж.С.га тегишли Lacetti’лар холислар иштирокида кўздан кечирилганда автомобилларда пиротехника борлиги аниқланган.
Аниқланишича, автомобилларнинг салони ва юкхонасида Балиқчи туманида яшовчи 23 ёшли фуқаро С.А.га тегишли бўлган, хорижда ишлаб чиқарилган «7Shots» номли 67 дона, «Золотой песок» номли 264 дона, «Корсар» номли 750 қути (ҳар бир қутида 60 донадан), «9Д» номли 11 дона — умумий нархи 1100 доллар бўлган пиротехника воситалари топилган.
Самарқанд вилоят ИИБ ЙҲХБ ахборот хизматининг «Дарё»га маълумот беришича, вилоятнинг Нуробод туманида ҳам 28 800 дона пиротехника воситасини ноқонуний олиб кетаётган ҳайдовчи аниқланган.
2020 йилнинг 10 декабрь куни Нуробод тумани «Меҳнаткаш» маҳалласи ҳудудидан ўтувчи автомобиль йўлида ташкил қилинган назорат тўсиқ постида Тошкент—Термиз йўналишида ҳаракатланиб келаётган Сурхондарё вилояти Жарқўрғон туманида яшовчи 30 ёшли Н.Ў. бошқарувидаги Cobalt’дан 48 блок 480 қути 28 800 дона «Трения» пиротехника воситалари борлиги маълум бўлган ва тегишли тартибда ҳужжатлаштириб олинган.
Мазкур ҳолатлар юзасидан терговга қадар текширув ҳаракатлари олиб борилмоқда.
Изоҳ (0)