Самарқанд вилоятида сўнгги икки йилда 26 миллиард сўм бюджет маблағларини талон-торож қилиш ҳолатлари аниқланган. Бу қилмишлар учун 246 нафар шахс жиноий жавобгарликка тортилган ҳамда 2 249 нафар шахсга нисбатан маъмурий иш қўзғатилган. Бу ҳақда «Дарё»га вилоят прокурори Равшан Машарипов маълум қилди.
Таъкидланишича, бюджетдан ташқари Пенсия жамғармасининг Тойлоқ туман бўлими мансабдор шахслари ноқонуний равишда 10 та ҳолатда 111 миллион сўмлик пенсия маблағларини пластик картага ўтказиб, ўзлаштириш йўли билан талон-торож қилган.
Шунингдек, вилоят Миллий банкида ишлаган А.Б. банк омонатчиларининг ҳисоб рақамидан жами 90 та ҳолатда 7,7 миллиард сўм, 607 минг доллар ва 1461 евро омонат маблағларини ўзлаштириш йўли билан талон-торож қилган.
«Агробанк»нинг Челак филиали ходими А.А. кредит ажратишни сўраб банкка мурожаат қилмаган фуқаролар номига 30 миллион сўм микроқарз кредити ажратиб, пулни пластик карточкасига тушириб, ўзлаштириб юборган.
«Ипотека банк»нинг Кўксарой филиали «Жума» мини-банки мудири Ч.Ч. банкнинг бошқа мансабдор шахслари билан жиноий тил бириктириб, давлат дастури асосида балиқчилик ва аҳоли тадбиркорлиги учун ажратилган 6 миллиард 995 миллион сўмлик кредит маблағларини талон-торож қилган.
Изоҳ (0)