Канада буюртма қилинган коронавирусга қарши вакциналар сони бўйича дунёда етакчилик қилмоқда. Meduza’нинг ёзишича, бу ҳақда очиқ маълумотлар асосида вакцина ташувларини кузатиб борувчи ўз трекерига таяниб, Bloomberg хабар берди.
Қайд этилишича, Канадада 153,9 миллион кишини (мамлакат аҳолисининг 410 фоизи) эмлаш учун вакцина етказиб бериш бўйича шартномалар мавжуд. Буюртма қилинган вакциналар сони бўйича иккинчи ўринда Буюк Британия (ўз аҳолисининг 295 фоизини эмлаши мумкин), учинчи ўринда эса Австралия (аҳолисининг 269 фоизини эмлай олади).
Канадада турли ишлаб чиқарувчиларнинг, хусусан, Moderna ва Pfizer/BioNTech компаниялари вакциналаридан фойдаланилади. 7 декабрь куни Канада бош вазири Жастин Трюдо эмлашлар келаси ҳафтадан бошланиши мумкинлигини маълум қилган.
Bloomberg маълумотларига кўра, Россияда 80 миллион кишини (мамлакат аҳолисининг 55 фоизини), АҚШда — 455 миллион кишини (мамлакат аҳолисининг 139 фоизини) эмлаш учун вакциналар етказиб бериш бўйича келишувлар мавжуд.
7 декабрь куни The Washington Post манбаларининг хабар беришича, ҳозирда ковид вакцинасининг энг йирик етказиб берувчиси бўлган Pfizer компанияси Америка ҳукуматига келаси йил ёзигача мамлакатга қўшимча 100 миллионта доза вакцина етказиб бера олмаслигини маълум қилган. Бунга Pfizer’нинг бошқа мамлакатлар ҳукуматлари билан ҳам шартнома тузгани сабаб бўлган.
Коронавирусга қарши Pfizer вакцинасини бутун дунё бўйлаб тарқатиш ноябрь ойи охиридан бошланди. Британия дунёда биринчи бўлиб ушбу компания вакцинасидан фойдаланишни маъқуллади. Pfizer 2020 йил охирига қадар, олдинроқ режалаштирилганидек, 100 миллион эмас, балки 50 миллион доза вакцина ишлаб чиқара олади.
ЖССТ 2021 йилнинг биринчи чорагида коронавирусга қарши 500 миллион доза вакцина тарқатиш ниятида.
Изоҳ (0)