Руминияда парламент сайловларидан кейин бош вазир истеъфо берди

Руминия бош вазири Людовик Орбан мамлакатда 6 декабрь куни бўлиб ўтган парламент сайловларидан кейин истеъфога чиқди, деб ёзади Романиа-Insider.

Орбаннинг сўзларига кўра, у Руминия ҳукумати раҳбари лавозимига янги муддат учун ўз номзодини қўймайди.

Шу билан бирга, у таркибига ўнг марказчи партиялар кирадиган бўлғуси коалицияни шакллантириш жараёнида иштирок этишини таъкидлади.

Президент Клаус Ёханнис мудофаа вазири Николае Чукени янги парламент янги ҳукумат учун овоз бергунига қадар вақтинчалик бош вазир этиб тайинлади.

6 декабрь куни Руминияда парламент сайловлари бўлиб ўтди. Овозларнинг 96 фоизи ҳисоблаб чиқилганидан кейин маълум бўлишича, мухолифатчи Социал-демократик партия (PSD) 29,69 фоиз, ҳукмрон Миллий либерал партия (PNL) эса 25,18 фоиз овоз тўплаган.

Аммо социал демократлар ҳукуматни шакллантира олиши даргумон, чунки либералларда потенциал иттифоқчилар кўпроқ.