Камбоджа АҚШ президенти Дональд Трампни тинчлик бўйича Нобель мукофотига номзод сифатида илгари сурди. Бунга сабаб сифатида Трампнинг Камбоджа ва Таиланд ўртасидаги чегара можаросига якун ясашдаги роли кўрсатилди. Бу ҳақда Fox News хабар берди.
Камбоджа бош вазири ўринбосари Сун Чантҳол 1 август куни пойтахт Пномпендаги матбуот анжуманида Трампнинг минтақада тинчликни таъминлашдаги хизматларини эътироф этган.
“Биз унинг тинчлик йўлидаги катта саъй-ҳаракатларини тан оламиз”, деди Чантҳол.
Унинг айтишича, Трамп давлатлар ўртасида дўстликни ривожлантириш йўлида энг катта ҳисса қўшган шахс сифатида ушбу нуфузли мукофотга лойиқ.
Дональд Трамп ўтган ҳафта Камбоджа ва Таиланд етакчилари билан телефон орқали мулоқот қилиб, томонларни оташкесимга ундаганди. У, шунингдек, можаро давом этса, АҚШ икки давлат билан савдо музокараларини давом эттирмаслигини билдирган. Натижада 28 июль куни Малайзияда ўтган музокаралар орқали 10 йилликдаги энг йирик қуролли тўқнашувлар тўхтатилган. Урушда камида 43 киши ҳалок бўлган, 300 мингдан ортиқ одам эвакуация қилинган.
Оқ уйнинг матбуот котиби Каролин Леавит ҳам Х тармоғида Трампнинг тўғридан-тўғри иштироки тинчлик келишувига олиб келганини айтиб, шундай деди:
“Бу Трамп туфайли амалга ошди. Тинчлик бўйича Нобель мукофотини унга беринг!”
Бу Трампнинг илк марта Нобель мукофотига номзод сифатида тилга олиниши эмас. Аввалроқ Исроил бош вазири Бенямин Нетаньяху ҳам Трампни ушбу мукофотга номзод сифатида кўрсатганди. Покистон расмийлари эса Ҳиндистон билан бўлган кескинликни юмшатишдаги роли учун уни мукофотга тавсия қилган эди.
Камбоджа бош вазири ўринбосари, шунингдек, АҚШ ҳукуматининг мамлакатга нисбатан бож ставкаларини камайтирганидан ҳам миннатдор эканини ўшимча қилган. Таъкидланишича, дастлаб 49 фоиз бўлиши кутилган тариф охир-оқибат 19 фоизгача туширилган. Бу Камбоджанинг асосий экспорт соҳаси — тикувчилик саноатини қутқариб қолгани айтилмоқда.
Изоҳ (0)