БМТнинг Гиёҳвандлик воситалари бўйича комиссияси тиббиёт марихуанаси ҳамда унинг ҳосиласини дунёдаги энг хавфли гиёҳванд моддалар тоифасидан чиқариб ташлаш бўйича қарор қабул қилди, деб хабар беради Meduza.
Комиссияга аъзо 53 давлатдан 27 таси, жумладан, АҚШ ва Европа Иттифоқи мамлакатлари қарорни маъқуллаган бўлса, Россия ва Хитой каби 25 та давлат бунга қарши овоз берган, биргина Украина бетараф қолган.
БМТ комиссиясининг баёнотига кўра, тиббиёт каннабиси 1961 йилда тузилган Гиёҳвандлик воситалари тўғрисидаги ягона конвенциянинг IV рўйхатидан чиқарилган. Ушбу модда бугунги кунга қадар героин каби кучли тобеликни келтириб чиқарувчи хавфли гиёҳванд моддалар билан бир қаторда турган эди. Мазкур қарор Жаҳон соғлиқни сақлаш ташкилотининг 2019 йил январдаги тавсияси асосида қабул қилинган.
Шу билан бирга, марихуана Гиёҳвандлик воситалари тўғрисидаги ягона конвенциянинг I рўйхатида қолган, яъни у барча гиёҳванд моддалар каби назорат остида бўлади.
Таъкидланишича, ушбу қарор каннабисдан тиббиёт мақсадларида фойдаланиш ва тадқиқотлар ўтказишда ижобий натижа беради. Экспертларнинг ҳисоблашича, БМТ қарори халқаро назоратнинг тезда сусайишига сабаб бўлмайди.
Аввалроқ Бухорода АҚШ компанияси билан биргаликда каннабис етиштириш кластери ташкил этилиши мумкинлиги тўғрисида хабар берилганди.
Мавзуга доир: Янги Зеландия референдумда эвтаназияни маъқуллади ва марихуана қонунийлаштирилишига қарши чиқди
Изоҳ (0)